रायबाग : आर्थिक व्यवहारातून मित्राचा शीर धडावेगळे करून खून केल्याची घटना गुरुवारी (ता. १७) रात्री रायबाग तालुक्यातील (Raibag) हारूगेरीजवळील बस्तवाड येथे घडली. अकबर शब्बीर जमादार (वय २१, रा. हारूगेरी, ता. रायबाग) असे खून झालेल्या तरुणाचे नाव आहे.

पोलिसांनी संशयित मारेकरी मित्र महांतेश शिवलिंग पुजारी (वय २३, रा. बडब्याकुड, ता. रायबाग) याला ताब्यात घेतले आहे. याबाबत माहिती अशी, अकबर आणि महांतेश हे दोघेही मित्र होते. ते दोघेही म्हशींची चोरी करून त्याची विक्री करत होते. याबाबत त्यांच्यावर पोलिस ठाण्यात गुन्हेही दाखल झाले आहेत.

या व्यवहारातून त्यांच्यात वाद झाला असावा. दोघेही गुरुवारी बस्तवाड येथील माळरानात गेले होते. तेथे दारू पिऊन त्यातून महांतेशने अकबरचा खून केला. अकबरच्या आईने पोलिसांना ही माहिती दिल्यानंतर ही घटना उघडकीस आली आहे. त्यांनी दिलेल्या माहितीनुसार पोलिसांनी कारवाई केली.

घटनास्थळी अथणीचे पोलिस उपअधीक्षक श्रीपाद जल्दे, उपनिरीक्षक गिरिमल उप्पार, गुन्हे विभागाचे उपनिरीक्षक आर. आर. कोगनळ्ळी, प्रशिक्षणार्थी उपनिरीक्षक चांदबी गंगावती, एच. एच. चौगला, आर. पी. कटेकार, एच. आर. आंबी, पी. एम. सप्तसागरे, ए. ए. शांडगी यांनी भेट देऊन पंचनामा केला.

महांतेशला पोलिसांनी ताब्यात घेतले आहे. अकबरचा मृतदेह शवचिकित्सेसाठी पाठवून त्यानंतर नातेवाईकांच्या नातेवाईकांच्या ताब्यात देण्यात आला. यावेळी अकबरच्या कुटुंबाचा आक्रोश सुरू होता.

याबाबत जिल्हा पोलिस अधीक्षक संजीव पाटील म्हणाले, दोघांवरही म्हशी चोरीचे गुन्हे आहेत. त्याच व्यवहारातून हा खून झाला असून, याचा अधिक तपास करण्यात येत आहे. मोबाईलसह इतर वस्तू जप्त केल्या असून, अधिक तपासासाठी त्या बेळगाव व बंगळूरला पाठविण्यात येणार आहेत. मारेकऱ्याने शीर धडावेगळे करून ते गावात घेऊन आल्याची खात्रीशीर माहिती नाही. त्याबाबतही माहिती घेतली जात आहे.