पाच राज्यांमध्ये झालेल्या पराभवानंतर काँग्रेसमध्ये सध्या अंतर्गत हालचाली वाढल्या आहेत. पक्षाच्या हंगामी अध्यक्ष सोनिया गांधी यांनी निवडणुकीनंतर काही मोठे निर्णय घेत, पाच राज्यांच्या प्रदेशाध्यक्षांचे राजीनामे घेतले. तर दुसरीकडे जी-२३ मधील नेत्यांनी आपली वेगळी भुमिका मांडल्याने पक्षात गृहकलह निर्माण झाला आहे. याच सगळ्या वादावर काँग्रेस खासदार अधीर रंजन चौधरी यांनी आपली प्रतिक्रिया दिली आहे.

सोनिया गांधी काँग्रेसमधील प्रत्येकाशी बोलण्यासाठी तयार आहेत. मात्र एकत्र लढण्याची गरज असताना काही राजकारणी (G23 नेते) पक्षाविरोधात विधानं करत आहेत. जर त्यांचा हेतू योग्य असेल तर ते सोनिया गांधींशी का बोलत नाहीत? असा सवाल चौधरी यांनी केला आहे. जेव्हा या राजकारण्यांना यूपीए सरकारमध्ये मंत्री करण्यात आलं, तेव्हा त्यांनी लोकशाही प्रक्रियेचा विचार करून पदं द्यावीत, असं सांगितलं होतं का? तेव्हा सर्व काही आलबेल होतं कारण आम्ही सत्तेत होतो. राजकीय पक्षाला चढ-उतार पाहावेच लागतात, याचा अर्थ बंडखोरी करावी असा होत नाही, असं परखड मत अधीर रंजन चौधरी यांनी व्यक्त केलं आहे.