बंगळूर : ‘कर्नाटकाच्या उपमुख्यमंत्रिपदी दलित नेत्याची (Dalit leader) निवड न केल्यास प्रतिकूल प्रतिक्रिया उमटेल’ असा इशारा काँग्रेसचे ज्येष्ठ नेते जी. परमेश्वर (G. Parameshwara) यांनी दिला.

कर्नाटकच्या मुख्यमंत्रिपदी सिद्धरामय्या यांची (Siddaramaiah) आणि उपमुख्यमंत्रिपदी डी. के. शिवकुमार यांची निवड करण्यात आल्यानंतर काही तासातच परमेश्वर यांनी हा इशारा दिला आहे.

‘शिवकुमार यांनी हायकमांडसमोर उपमुख्यमंत्रिपदाबाबत अट ठेवली होती असे बोलले जात आहे. याबाबत परमेश्वर यांना विचारले असता ते म्हणाले, 'शिवकुमार यांच्या दृष्टीने त्यांची मागणी बरोबर असेल तरी हायकमांडचा याबाबतचा दृष्टिकोन वेगळा असू शकतो आणि निर्णय हायकमांडलाच घ्यायचा असल्याने दलित समाजाला पक्षाकडून अपेक्षा आहेत.'

दलितांवर अन्याय होऊ नये अशी आमची अपेक्षा आहे. हायकमांडने (Congress High Command) तातडीने याबाबत निर्णय घ्यावा अशी मागणी देखील परमेश्वर यांनी केली. परमेश्वर या मागणीची हायकमांड दखल घेणार का, हे पाहणं महत्वाचं ठरणार आहे.