हिमाचल प्रदेशमध्ये निवडणूक (Himachal Pradesh Election) प्रचार थांबल्यानं राजकीय वारं गुजरातच्या दिशेनं वाहू लागलंय. काँग्रेस पक्षानं (Congress Party) गुजरात निवडणुकीसाठी (Gujarat Election) 46 उमेदवारांची नावं असलेली दुसरी यादीही प्रसिद्ध केलीय.

यापूर्वी पक्षानं 43 उमेदवारांची नावं जाहीर केली आहेत. आतापर्यंत एकूण 89 जणांना विधानसभेचं तिकिटं देण्यात आलं आहे. दुसरीकडं आम आदमी पक्ष आणि भाजपनंही (BJP) बहुतांश उमेदवारांची नावं जाहीर केली आहेत. काँग्रेसच्या दुसऱ्या यादीत जुनागढमधून भिखाभाई जोशी, सुरत पूर्वमधून अस्लम सायकलवाला, सूरत उत्तरमधून अशोक भाई पटेल, वलसाडमधून कमल कुमार पटेल आणि भुजमधून अर्जन भाई भुडिया यांच्या नावांचा समावेश आहे.

गुजरातमध्ये दोन दशकांपासून सत्तेबाहेर असलेला काँग्रेस पक्ष निवडणुकीत विजयासाठी घाम गाळत आहे. मात्र, नव्यानं सुरू झालेला आम आदमी पक्षही या निवडणुकीत उतरल्यानं रंगत वाढलीय. दरम्यान, सत्ताधारी भाजपनंही विधानसभा निवडणुकीसाठी उमेदवारांची पहिली यादी जाहीर केलीय. या यादीत काँग्रेसमधून भाजपमध्ये आलेला पाटीदार नेता हार्दिक पटेल आणि क्रिकेटर रवींद्र जडेजाची पत्नी रिवाबा जडेजा यांच्या नावांचाही समावेश आहे. भाजपनं पाच विद्यमान मंत्र्यांसह सुमारे तीन डझन आमदारांची तिकिटं कापली आहेत.

भाजपनं आपल्या पहिल्या यादीतच 160 उमेदवारांची नावं जाहीर केली आहेत. माजी मुख्यमंत्री विजय रुपाणी (Vijay Rupani) यांच्यासारख्या अनेक दिग्गज नेत्यांनी निवडणूक लढवणार नसल्याचं जाहीर केलं आहे. दुसरीकडं विद्यमान मुख्यमंत्री भूपेंद्र पटेल (Bhupendra Patel) यांना घाटलोडियातून तिकीट देण्यात आलं आहे. या जागेवरून भूपेंद्र पटेल अजूनही आमदार आहेत. गुजरातमधील एकूण 182 जागांसाठी 1 आणि 5 डिसेंबरला दोन टप्प्यात मतदान होणार आहे. हिमाचल आणि गुजरात निवडणुकांचे निकाल 8 डिसेंबरला जाहीर होणार आहेत.