सीमाशुल्क विभागाच्या अधिकाऱ्यांनी रविवारी (ता. २४) अमृतसरमध्ये अफगाणिस्तानातून पाकिस्तान चेकपोस्टवरून येणारा ट्रक पकडला तेव्हा त्यांना आश्चर्याचा धक्का बसला. या ट्रकमध्‍ये अधिकाऱ्यांना तब्बल ७०० कोटींचे १०२ किलो हेरॉईनची (Heroin) खेप सापडली. ही हेरॉईन दिल्लीतील एका आयातदाराने अफगाणिस्तानातून येणाऱ्या दारूच्या खेपेत लपवून ठेवल्याचे सांगितले जात आहे. ही कारवाई अटारी सीमेवर करण्यात आली. (Heroin worth Rs 700 crore seized)

इंडिया टुडेच्या वृत्तानुसार, अफगाणिस्तानातून आयसीपी अटारी येथे आलेल्या ट्रकच्या गोणीत दारूसह लाकूड ​​लपवले होते. तपासणी केली असता हे प्रकरण पुढे आले. काही लाकडांवर डाग दिसल्यानंतर अधिकाऱ्याला संशय आला. संशयाच्या आधारे कस्टम अधिकाऱ्यांच्या उपस्थितीत पिशव्या उघडण्यात आल्या.

यावेळी लहान दंडगोलाकार छिद्र दिसले. या छिद्रांमध्ये हेरॉईन लपवण्यात आली होती. रात्रभर कस्टमचे पथक हेरॉईन बाहेर काढत राहिले. यावेळी पथकाला १०२ किलो हेरॉईन (Heroin) सापडले. आतापर्यंतची ही दुसरी सर्वांत मोठी कारवाई आहे. यापूर्वी २०१९ मध्ये आयसीपी अटारी येथे ५८४ किलो हेरॉईन पकडण्यात आली होती.

दारूची ही खेप अफगाणिस्तानातील (Afghanistan) मजार-ए-शरीफ शहरातून अलीम नजीर कंपनीने दिल्लीतील व्यापाऱ्याकडे पाठवली होती, असे सांगण्यात येते. त्यात हेरॉईन (Heroin) कोणी आणि कोणासाठी ठेवले होते, याचा तपास सुरू झाला आहे. या ३४० पोती दारू मजीठ मंडीशी संलग्न असलेल्या कस्टम हाउसच्या एजंटकडून प्राप्त करून दिल्लीतील व्यापाऱ्याकडे पाठवल्या जाणार होत्या. सध्या या प्रकरणाचा तपास सुरू आहे.