जयपूर: भारतात सांस्कृतिक प्रतिके आणि त्यासंदर्भातील वाद प्रसिद्ध आहेत. ठिकठिकाणी असे वाद प्रचलित आहेत. अशा वादांवरुन बरेच मोठे वादंग देखील वेळोवेळी पहायला मिळाले आहेत. असाच एक नवा वाद आता आकार घेताना दिसतोय. राजस्थानातील जयपूरपासून १० किमी अंतरावर असलेला आमागढ (अंबागढ) किल्ला सध्या वादाच्या भोवऱ्यात सापडला आहे. हा वाद हिंदूत्ववादी संघटना आणि आदिवासी मीणा समुदायामध्ये आहे.

काय आहे प्रकरण?

या प्रकरणाची सुरुवात २१ जुलैपासून सुरु झाली आहे. सोशल मीडियावर एक व्हिडीओ व्हायरल झाल्यानंतर हा वाद निर्माण झाला आहे. या व्हिडीओमध्ये आदिवासी मीणा समुदायाचे काही लोक आमागढ किल्ल्यावरील भगवा झेंडा उतरवताना दिसत आहेत. हा भगवा झेंडा उतरवताना तो फाटल्याचा दावा करत आरएसएसशी संबधित अनेक लोकांनी या प्रकाराचा निषेध केला आहे.

राज्यसभेतील भाजपचे खासदार किरोडीलाल मीणा यांनी राजस्थान सरकारला पत्र लिहून या प्रकरणी हस्तक्षेप करण्याची मागणी केली आहे. सोबतच किरोडीलाल यांनी आमदार रामकेश मीणा यांच्या अटकेची मागणी करत म्हटलंय की, मीणा समाजाचे लोक कायमच हिंदू होते आणि ते पुढे देखील हिंदू परंपरांचं पालन करतील. २१ जुलै रोजी झालेल्या या घटनेनंतर मीणा समुदाय आणि हिंदू संघटनांनी एकमेकांविरोधात IPC च्या २९५ कलम आणि आयटी कायद्याअंतर्गत FIR दाखल केली आहे.

मीणा समाजातील लोकांचा आरोप आहे की युवा शक्ती मंच नावाच्या एका संघटनेने आमागढ किल्ल्यावर एका खांबावर भगवा झेंडा लावला मंदिरात परिसरातील प्राचीन मुर्त्यांच्या जागी नव्या प्रतिमा ठेवल्या आणि त्या ठिकाणी अंबिका भवानी माता मंदिर असल्याचा दावा केला जातो आहे. मीणा समुदायाचा पहिल्यापासूनच हा दावा आहे की, आमागढ किल्ला आदिवासी मीणा समुदायाच्या राजांचा आहे आणि त्याठिकाणी नाढला गोत्राच्या मीणांचा जुना आमागढ किल्ला आणि अंबा मातेचे प्राचीन मंदिर आहे. त्यामुळे, आदिवासी आणि हिंदू धर्मातील जुनापुराणा वाद आता या निमित्ताने पुन्हा एकदा वर आला आहे.