काँग्रेसचे जेष्ठ नेते गुलाम नबी आझाद यांनी शुक्रवारी राजीनामा दिला आहे. त्यांच्या राजीनाम्यानंतर राजकीय वर्तुळात चर्चा सुरू झाली ती म्हणजे भाजप प्रवेशाची. दरम्यान, या चर्चेला वर आझाद यांनी मोठे वक्तव्य करत खळबळ माजवली आहे. एक काश्मिरी भाजपमध्ये कसा काय प्रवेश करू शकतो? असे अंदाज वर्तवण्याची मला चीड येते. असे वक्तव्य आझाद यांनी केलं आहे.(How can a Kashmiri join BJP? Ghulam Nabi Azad)

एका वृत्तसंस्थेनुसार, गुलाम नबी आझाद आता भाजपसोबत युती करतील, असं काँग्रेस नेत्यांकडून सांगितलं जात आहे. दरम्यान, आझाद यांनी काँग्रेसचा हा मुर्खपणा असल्याचे म्हटले आहे. तसेच, एक काश्मिरी भाजपमध्ये कसा काय प्रवेश करू शकतो? असे अंदाज वर्तवण्याची मला चीड येते. मी कॉलेजमध्ये असल्यापासून काँग्रेसमध्ये होतो. मी कधीच भाजपमध्ये जाऊ शकत नाही. असे स्पष्ट सांगत मी काश्मीरच्या विधानसभा निवडणुकीत माझा स्वत:चा पक्ष उतरवेल. अशी जाहीर घोषणा आझाद यांनी यावेळी केली.

काँग्रेसचे ज्येष्ठ नेते गुलाम नबी आझाद यांनी शुक्रवारी सुमारे पाच दशकांनंतर पक्षाचा निरोप घेतला. यावेळी त्यांनी देशातील सर्वात जुना पक्ष आता "पूर्णपणे नष्ट" झाला आहे आणि त्याचं नेतृत्व अंतर्गत निवडणुकांच्या नावाखाली 'फसवणूक करत आहे.' असा आरोप त्यांनी यावेळी केला.

आझाद यांनी काँग्रेसचा राजीनामा देताना सोनिया गांधी यांना एक पत्रं लिहीत राहुल गांधींवर टीका केली होती. राहुल गांधी आपल्या अवतीभोवती अनुभव नसलेल्या लोकांना ठेवतात. राहुल गांधींचे सुरक्षा रक्षक आणि पर्सनल स्टाफच सर्व निर्णय घेतो की काय असं वाटतंय. राहुल गांधी राजकारणात आल्यानंतर दुर्देवाने त्यांना उपाध्यक्ष करण्यात आले. त्यावेळी त्यांनी काँग्रेसची कार्यप्रणालीच उद्ध्वस्त करून टाकली. त्यांनी पक्षाची सल्लागार टीमच नष्ट करून टाकली, अशी टीकाही त्यांनी केली.