नवी दिल्ली - देशाच्या स्वातंत्र्याला 75 वर्षे पूर्ण असल्याच्या पार्श्वभूमीवर अमृत महोत्सव देशात साजरा करण्यात येत आहे. नुकत्याच झालेल्या मन की बातच्या कार्यक्रमात मोदींनी अमृत महोत्सवाबाबत सांगितलं होतं. अमृत महोत्सव हा राजकीय कार्यक्रम नसून हा भारतीयांचा महोत्सव आहे. 'सध्या सुरु असलेल्या ऑलिम्पिकमध्ये भारतीयांच्या दिमाखदार अशा कामगिरीने अमृत महोत्सव साजरा करताना आणखी उत्साह वाढवला आहे', असं मोदींनी ट्विटरवरून म्हटलं आहे.

पंतप्रधान मोदींनी म्हटलं की, ऑगस्टमध्ये अमृत महोत्सवाला सुरुवात होत आहे. प्रत्येक भारतीयाच्या हृदयाला भिडणाऱ्या अशा अनेक घटना घडत आहेत. देशात विक्रमी लसीकरण आणि जीएसटीचे विक्रमी संकलन ज्यामुळे देशाची अर्थव्यवस्था मजबूत होण्याचे संकेत मिळत आहेत.

ऑलिम्पिकमध्ये पदक मिळवणाऱ्या पीव्ही सिंधूसह भारताचे महिला आणि पुरुष हॉकी संघांनीसुद्धा ऐतिहासिक कामगिरी केली आहे. यंदाचा अमृत महोत्सव साजरा करत असताना 130 कोटी भारतीय नक्कीच या सोहळ्यानिमित्त भारताला आणखी उंचीवर नेतील असा विश्वासही मोदींनी व्यक्त केला आहे.

मोदींनी मन की बात या आकाशवाणीवरील कार्यक्रमात सांगितलं होतं की, देश स्वांतंत्र्याच्या 75 व्या वर्षात पदार्पण करत आहे. हे आपलं भाग्य आहे की, ज्या स्वांतत्र्यासाठी देशाने बराच काळ संघर्ष केला, वाट पाहिली त्याला 75 वर्षे होत आहेत आणि त्याचे आपण साक्षीदार आहे. स्वातंत्र्यांची 75 वर्षे साजरी करण्याची सुरुवात ही 12 मार्चला साबरमती आश्रमातून झाली होती. तेव्हापासून जम्मू काश्मीर ते पुद्दुचेरी, गुजरात ते पुर्वोत्तर राज्यांमध्ये अमृत महोत्सवाशी संबंधित कार्यक्रम सुरु आहेत.