जम्मू-काश्मीरच्या (Jammu-Kashmir) कुपवाडामध्ये सुरक्षा दल (Security Forces) आणि दहशतवाद्यांमध्ये (Terrorists) मोठी चकमक सुरूय. गेल्या 24 तासांमध्ये सुरक्षा दलाच्या जवानांनी सहा दहशतवाद्यांचा खात्मा केलाय. गुरुवारी सकाळी कुपवाडामध्ये (Kupwada) घुसखोरीच्या प्रयत्नात असणाऱ्या दहशतवाद्यांना ठार मारण्यात आलंय. या चकमकीत लष्कराचे तीन दहशतवादी ठार झाले आहेत. घटनास्थळावरून शस्त्रे जप्त करण्यात आली आहेत.

एएनआय या वृत्तसंस्थेनुसार, जम्मू-काश्मीर पोलिसांना (Jammu and Kashmir Police) कुपवाडा येथील जुमागुंड गावातून (Juma Gund village) काही दहशतवादी भारतीय सीमेत घुसण्याचा प्रयत्न करत असल्याची माहिती मिळाली होती. या माहितीच्या आधारे सुरक्षा दलांनी नाकाबंदी केली. त्यानंतर चकमक सुरू झाली. या चकमकीत तीन दहशतवाद्यांना ठार करण्यात सुरक्षा दलांना यश आलंय. आयजीपी काश्मीर यांनी सांगितलं की, मारले गेलेले दहशतवादी प्रतिबंधित दहशतवादी संघटना लष्करशी संबंधित होते. दहशतवाद्यांची ओळख पटवली जात आहे. घटनास्थळावरुन शस्त्रास्त्रे आणि दारूगोळा यासह घातक साहित्य जप्त करण्यात आलं आहे.

बुधवारी तिघांना कंठस्थान

जम्मू-कश्मीरमधील बारामुल्ला इथं पोलीस आणि सुरक्षा दलांनी केलेल्या संयुक्त कारवाईत तीन दहशतवाद्यांचा खात्मा करण्यात आला होता. या चकमकीत जम्मू-कश्मीर पोलिसांचा एक जवानही शहीद झाला आहे. ठार झालेले तीनही दहशतवादी पाकिस्तानचे (Pakistan) होते, अशी माहिती पोलिसांनी दिलीय.