जम्मू-काश्मीरमधील कुलगाम (Kulgam Jammu and Kashmir) जिल्ह्यात शनिवारी झालेल्या ग्रेनेड हल्ल्यात (Grenade Attack) एक पोलीस शहीद झाल्याची दुःखद बातमी समोर येत आहे. कुलगाममधील कैमोह (Qaimoh) इथं ग्रेनेड हल्ला झाला होता, यात मेंढर येथील पोलीस कर्मचारी ताहिर खान जखमी झाला होता.

काश्मीर पोलिसांनी (Kashmir Police) दिलेल्या माहितीनुसार, ताहिर खानला अनंतनाग येथील शासकीय वैद्यकीय महाविद्यालय रुग्णालयात उपचारासाठी नेण्यात आलं होतं, तिथं त्याचा मृत्यू झाला. काश्मीर पोलिस झोनच्या अधिकृत ट्विटवरुन ही माहिती देण्यात आलीय. ट्विटमध्ये लिहिलंय, “काल रात्री कैमोह (कुलगाम) इथं ग्रेनेड हल्ल्याची माहिती मिळाली. या दहशतवादी घटनेत पूंछचा पोलीस कर्मचारी ताहिर खान जखमी झाला. त्याला उपचारासाठी जीएमसी हॉस्पिटल (अनंतनाग) इथं हलवण्यात आलं. मात्र, उपचारादरम्यान तिथं त्याचा मृत्यू झाला.

या ग्रेनेड हल्ल्यापूर्वी राजौरी जिल्ह्यातील लष्कराच्या तळावर पहाटे दोन दहशतवाद्यांनी (Terrorist) हल्ला केला होता. या हल्ल्यात चार जवान शहीद झाले असून जवानांनी दोन्ही दहशतवाद्यांचा खात्मा केला. दोन्ही दहशतवादी पाकिस्तानस्थित जैश-ए-मोहम्मदचे होते.