जम्मू-काश्मीरच्या (Jammu and Kashmir) श्रीनगर शहर सुरक्षा दलांनी (Indian Army) शुक्रवारी मोठी कारवाई केली. श्रीनगरच्या (Shrinagar) झाकुरा परिसरात पोलीस आणि दहशतवाद्यांमध्ये झालेल्या मोठ्या चकमकीत पोलिसांनी दोन दहशतवाद्यांना (Two Terrorist Neutralized) कंठस्नान घातलं. काश्मीर झोन पोलिसांनी शुक्रवारी ही माहिती दिली. श्रीनगर पोलीस आणि सुरक्षा दलांनी लष्कर-ए-तोयबा (LET) आणि हिजबुल मुजाहीद्दीनच्या दोन दहशतवाद्यांना ठार केल्याचं समजतंय. पोलिसांनी सांगितलं की, दहशतवाद्यांच्या ताब्यातून 2 पिस्तुलांसह आणखी काही गोष्टी जप्त करण्यात आल्या आहेत.

शुक्रवारी सकाळी झालेल्या या चकमकीत इकलाख हजम हा दहशतवादीही मारला गेला. अनंतनागच्या हसनपोरा येथील एचसी अली मोहम्मद यांच्या हत्येत हजमचाही हात होता. याआधी बुधवारीही सुरक्षा दलांना मोठं यश मिळालं होतं. शुक्रवारी झालेल्या चकमकीत हिजबुल मुजाहिद्दीनचा एक दहशतवादी मारला गेला. पोलिसांनी दिलेल्या माहितीनुसार, उमर इश्फाक मलिक उर्फ ​​मुसा असं या दहशतवाद्याचे नाव आहे.

शोपियानच्या नदीगाम गावात दहशतवादी लपल्याची माहिती मिळाल्यावर, पोलिस, लष्कर आणि सीआरपीएफने संयुक्त कारवाई सुरू केली होती. कारवाईसाठी यंत्रणा घटनास्थळी पोहोचताच लपलेल्या दहशतवाद्यांनी गोळीबार सुरू केला. या गोळीबाराला सुरक्षा दलांनी चोख प्रत्युत्तर दिलं.