नवी दिल्ली : अंमलबजावणी संचालनालयानं (ED) कर्नाटक काँग्रेसचे प्रदेशाध्यक्ष डीके शिवकुमार (Karnataka Congress State President DK Shivakumar) आणि त्यांच्या भावाला 7 ऑक्टोबरला चौकशीसाठी दिल्लीत बोलावलं आहे.

यापूर्वी डीके यांनी ईडीसमोर वेळेची मागणी केली होती. मात्र, ती ED नं फेटाळली होती. ईडीच्या या निर्णयानंतर काँग्रेस नेते डीके शिवकुमार यांनी याबाबत त्यांच्या पक्षाच्या नेत्यांशी चर्चा करणार असल्याचं सांगितलंय. कर्नाटकच्या काँग्रेस नेत्यांनी यंग इंडिया प्रायव्हेट (National Herald Case) लिमिटेडला निधीच्या संशयास्पद योगदानासंदर्भात अंमलबजावणी संचालनालयानं हे समन्स जारी केलं आहे.

यामध्ये काँग्रेसचे कर्नाटक प्रमुख डीके शिवकुमार आणि त्यांचे भाऊ आणि खासदार डीके सुरेश यांच्या नावाचा समावेश आहे. कर्नाटकच्या या दोन काँग्रेस नेत्यांना ईडीनं शुक्रवारी 7 ऑक्टोबर रोजी चौकशीसाठी दिल्लीत बोलावलंय. ईडीच्या या समन्सबाबत डीके शिवकुमार म्हणाले, 'मी ईडीसमोर हजर राहण्यासाठी वेळ मागितली होती. मात्र, ती त्यांनी फेटाळली आहे. याबाबत मी आमच्या नेत्यांशी चर्चा करणार आहे, असं त्यांनी सांगितलं.