बंगळूरु (कर्नाटक) : कन्नड चित्रपटसृष्टीतील प्रसिद्ध अभिनेता पुनीत राजकुमार Superstar Puneeth Rajkumar याचं (वय 46) शुक्रवारी (ता. 29) हृदयविकाराच्या झटक्यानं बंगळूर येथे निधन झाले. त्यांच्या निधनामुळे कन्नड चित्रपटसृष्टीवर शोककळा पसरलीय. प्रसिद्ध अभिनेते दिवंगत डॉ. राजकुमार यांचे ते तृतीय सुपुत्र होते. शुक्रवारी सकाळी जिममध्ये असताना पुनीत राजकुमार यांना हृदयविकाराचा झटका आला. त्यांना लागलीच बंगळूर येथील विक्रम रुग्णालयात (Vikram Hospital) दाखल करण्यात आले. मात्र, त्याआधीच त्यांची प्राणज्योत मालवली.

पुनीत राजकुमार यांना बालपणापासूनच अभिनयाची आवड होती. बालकलाकार म्हणून त्यांनी अनेक कन्नड चित्रपटात काम केले आहे. राज्यभरात त्यांचे असंख्य चाहते असून त्यांच्या अभिनय शैलीमुळे पुनीत राजकुमार यांना 'पावर स्टार' ही पदवी दिली होती. सुमारे सात महिन्यापूर्वी पुनीत आपल्या एका चित्रपटाच्या प्रमोशनसाठी बेळगावात आले होते. दरम्यान, पुनीत राजकुमार यांच्या निधनाबद्दल राज्याचे मुख्यमंत्री बसवराज बोमई यांच्यासह सर्व राजकीय पक्षाचे नेते आणि कन्नड चित्रपटसृष्टीतील अनेक दिग्गजांनी दुखवटा व्यक्त केला आहे.