छत्तीसगडचे (Chhattisgarh) उत्पादन शुल्क मंत्री कवासी लखमा (Kawasi Lakhma) यांचा एक व्हिडिओ व्हायरल होत आहे. यामध्ये त्यांनी दारू पिण्याबाबत मोठं वक्तव्य केलंय.

बस्तरमध्ये काही झालंतरी दारूबंदी (Alcohol Ban) होऊ देणार नाही, असे ते म्हणालेत. कवासी पुढं म्हणाले, 'दारू पिल्यामुळं माणूस मजबूत होतो. पण, जास्त पिल्यानं त्याचा मृत्यूही होतो. औषध आणि दारू एकच असून दोन्हीपैकी एक काहीतरी प्यावं लागतं.

व्हायरल व्हिडिओमध्ये कवासी लखमा म्हणताहेत, 'परदेशात 100 टक्के लोक दारू पितात. बस्तरमध्ये 90 टक्के लोक दारू पितात. पण, कसं प्यावं हे माहित नाही. दारू पिऊन माणूस मरत नाही. तर, मद्यपान तुम्हाला मजबूत बनवतं. मात्र, जास्त मद्यपान केल्यामुळं मृत्यूही होतो.'

जर मजूर दारू प्यायले नाहीतर ते जड माल उचलू शकणार नाहीत, कष्ट करू शकणार नाहीत, असंही त्यांनी स्पष्ट केलं. छत्तीसगडमध्ये दारूबंदी असेल तर बस्तरमध्ये ती होऊ देणार नाही. मी जिवंत असेपर्यंत असं काही होऊ देणार नाही. मात्र, दिल्ली आणि रायपूर सरकार दारूबंदी करू शकत नाही, असंही ते म्हणाले.