विश्व भारती विद्यापीठ (Visva Bharati University), शांतिनिकेतन आणि नोबेल पारितोषिक विजेते अमर्त्य सेन (Amartya Sen) यांच्यात सुरू असलेल्या जमिनीच्या वादाच्या पार्श्वभूमीवर, त्यांना आज (रविवार) झेड प्लस सुरक्षा प्रदान करण्यात आलीये.

काही दिवसांपूर्वी मुख्यमंत्री ममता बॅनर्जी (Mamata Banerjee) यांनी विद्यापीठ आणि अमर्त्य सेन यांच्यात सुरू असलेल्या जमिनीच्या वादात हस्तक्षेप करत सुरक्षा वाढवण्याची मागणी केली होती. यानंतर आज त्यांना झेड प्लस सुरक्षा देण्यात आली. दरम्यान, अमर्त्य सेन आज दिल्लीला रवाना झाले आहेत.

आज सकाळपासून अमर्त्य सेन यांना झेड प्लस सुरक्षा पुरवण्यात आलीये. अमर्त्य सेन यांच्या 'प्रचिती' निवासस्थानाला Z+ सुरक्षेनं वेढा घातला आहे. घराबाहेर अत्याधुनिक शस्त्रांनी सज्ज असलेले सुरक्षा कर्मचारी मोठ्या संख्येने तैनात आहेत. सूत्रांनी दिलेल्या माहितीनुसार, अमर्त्य सेन 16 किंवा 17 फेब्रुवारीला शांतीनिकेतनला परतणार आहेत.

मिळालेल्या माहितीनुसार, आतापर्यंत राज्यात झेड प्लस सुरक्षा फक्त दोनच लोकांकडं होती. एक स्वत: मुख्यमंत्री आणि दुसरे तृणमूल काँग्रेसचे राष्ट्रीय सरचिटणीस आणि खासदार अभिषेक बॅनर्जी यांच्याकडं. आता राज्यात झेड प्लस सुरक्षा मिळवणारे अमर्त्य सेन हे तिसरे व्यक्ती आहेत. यापूर्वी त्यांना वाय श्रेणीची सुरक्षा मिळाली होती.