उत्तर प्रदेश विधानसभा निवडणुकीत (Uttar Pradesh Assembly Election) नशीब आजमावल्यानंतर असदुद्दीन ओवैसी (Asaduddin Owaisi) यांचा पक्ष ऑल इंडिया मजलिस-ए-इत्तेहादुल मुस्लीमीन (AIMIM) आता राजस्थानात एन्ट्री करत आहे. गेल्या 2 महिन्यांपासून राजस्थानमधील जनतेशी संवाद साधल्यानंतर, ओवैसींनी मंगळवारी जयपूर इथं पत्रकार परिषद घेऊन पक्षाच्या कोअर कमिटीच्या स्थापनेची माहिती दिली. यात राज्यातील 6 लोकांचा समावेश असणार आहे.

एमआयएमनं राज्य पातळीवर पक्षाच्या पदाधिकाऱ्यांच्या जबाबदाऱ्याही निश्चित केल्या आहेत. त्याचवेळी ओवैसींनी राजस्थान विधानसभा निवडणुकीत पक्ष किती जागा लढवणार याबाबत भविष्यात घोषणा केली जाईल, असं सांगितलंय. तर, दुसरीकडं निवडणुकीसंदर्भात इतर राजकीय पक्षांसोबतच्या युतीबाबत ओवैसी म्हणाले, राज्यातील राजकीय परिस्थिती पाहता आमचं लक्ष संघटन मजबूत करण्यावर आहे, त्यानंतरच कोणत्याही पक्षाशी युती करण्याचा विचार करू, असं त्यांनी नमूद केलंय.

राजस्थानमध्ये एआयएमआयएमचा प्रवेश इतर राज्यांप्रमाणंच राजस्थानमध्येही काँग्रेससाठी (Congress) आव्हान ठरू शकतो, असं सांगण्यात येतंय. ओवैसींच्या प्रवेशामुळं काँग्रेसच्या पारंपरिक व्होटबँकेला हादरा बसू शकतो, अशा स्थितीत राज्यातील सुमारे 40 विधानसभा मतदारसंघांत काँग्रेसची पाळेमुळं हादरून गेल्यानं अनेक दिग्गज नेत्यांवर निवडणुकीत संकट येऊ शकतं, असंही राजकीय जाणकारांचं म्हणणं आहे.

निवडणुकीबाबत ओवैसी म्हणाले, 'राजस्थान विधानसभा निवडणुकीत (Rajasthan Assembly Election) आम्ही पूर्ण ताकदीनं लढणार आहोत. मात्र, त्यांनी जागांच्या संख्येबाबत काहीही जाहीर केलं नाही. सध्या आम्ही राजस्थानमध्ये आमचं संघटन मजबूत करू, नंतर भविष्यात कोणत्याही पक्षाशी युती करण्याबाबत निर्णय घेऊ.' दरम्यान, राजस्थानमध्ये नुकत्याच झालेल्या जातीय दंगलीवरून ओवैसींनी गेहलोत सरकारवर हल्लाबोल केला. राज्यात शांतता प्रस्थापित करण्याचा सरकारचा दावा अत्यंत कमकुवत असल्याचं ओवैसींनी म्हटलंय.