Toor and Urad Dal Price: काही दिवसांपासून डाळींच्या दरात मोठी वाढ पाहायला मिळत आहे. विशेषत: तूर आणि उडीद डाळींचे भाव वाढत आहेत. आता डाळींच्या वाढत्या किंमती रोखण्यासाठी सरकारने विशेष पाऊल उचलले आहे. याचा सर्वसामान्यांना फायदा होईल, अशी आशा केंद्र सरकारला आहे.

केंद्र सरकारने शुक्रवारीच घाऊक विक्रेते, किरकोळ विक्रेते आणि आयातदाराकडे ठेवलेल्या तूर आणि उडीद डाळीवर ऑक्टोबरपर्यंत साठ्याला मर्यादा लागू केली आहे. त्यामुळे तूर आणि उडीद डाळींचे भाव घसरतील किंवा भाव स्थिर राहू शकतात.

तूर आणि उडीद डाळींचे भाव किती वाढले आहेत?

या संदर्भातील आदेश केंद्रीय अन्न आणि ग्राहक व्यवहार मंत्रालयाने साठ्याला आळा घालण्यासाठी आदेश दिले आहेत.

शुक्रवारी तूर डाळींची सरासरी किरकोळ किंमत 19 टक्क्यांनी वाढून 122.68 रुपये प्रति किलो झाली, जी एका वर्षापूर्वी 103.25 रुपये प्रति किलो होती.

दुसरीकडे, उडीद दाळीची सरासरी किरकोळ किंमत 5.26 टक्क्यांनी वाढून 105.05 रुपयांवरून 110.58 रुपये प्रति किलो झाली आहे.

किरकोळ विक्रेत्यांसाठी साठ्यावर मर्यादा:

पीटीआयच्या वृत्तानुसार, ग्राहक सचिव रोहित कुमार सिंह यांनी सांगितले की तूर आणि उडीद दाळीसाठी सर्व राज्ये आणि केंद्रशासित प्रदेशांसाठी 31 ऑक्टोबर 2023 पर्यंत साठ्यावर मर्यादा निश्चित करण्यात आली आहे.

या आदेशानुसार तूर आणि उडीद दाळीसाठी साठा मर्यादा घाऊक विक्रेत्यांसाठी 200 टन, किरकोळ विक्रेते आणि किरकोळ दुकानदारांसाठी 5 टन आणि मोठ्या किरकोळ विक्रेत्यांसाठी डेपोमध्ये 200 टन ठेवण्यात आली आहे.

पोर्टलवर साठा लिमिट अपलोड करण्यास सांगितले आहे:

आयातदारांना सीमाशुल्क मंजुरीच्या तारखेपासून 30 दिवसांपेक्षा जास्त साठा ठेवण्याची परवानगी नाही. मंत्रालयाने ग्राहक व्यवहार विभागाला पोर्टलवर (https://fcainfoweb.nic.in/psp) साठा मर्यादेची स्थिती अपलोड करण्यास सांगितले आहे.

डाळींचे उत्पादन घटण्याचा अंदाज:

कृषी विभागाच्या आकडेवारीनुसार, देशाचे तूर उत्पादन मागील वर्षीच्या 4.22 दशलक्ष टनांच्या तुलनेत 2022-23 जुलै-जूनमध्ये 3.43 दशलक्ष टन असण्याचा अंदाज आहे. दुसरीकडे, उडदाचे उत्पादन 2.77 दशलक्ष टनांवरून 2.61 दशलक्ष टनांपर्यंत घसरण्याचा अंदाज आहे.