नवी दिल्ली: काँग्रेसचे माजी अध्यक्ष आणि विद्यमान खासदार राहुल गांधी (Rahul Gandhi) सरकारच्या आर्थिक धोरणावर सातत्याने टीका करत आहेत. बुधवारी पुन्हा एकदा राहुल गांधींनी ट्विटच्या माध्यमातून पंतप्रधान नरेंद्र मोदी आणि केंद्र सरकारवर निशाणा साधलाय. मोदी है तो मुमकीन है! असं म्हणत त्यांनी देशातील अर्थव्यवस्था बिकट अवस्थेत असल्याचे निदर्शनास आणून देण्याचा प्रयत्न केलाय.

पंतप्रधान मोदींनी मुख्यमंत्र्यांना दिला कोरोना मंत्र!

राहुल गांधी यांनी Infosys चे संस्थापक एन आर नारायणमूर्ती (N R Narayanmurthi) यांनी केलेल्या वक्तव्याचा दाखला देत मोदी सरकारवर तोफ डागली आहे.  'मोदी है तो मुमकिन है' असा उल्लेख करत त्यांनी नारायण मूर्ती यांच्या वक्तव्याचा फोटो शेअर केला आहे. कोरोना विषाणूच्या पार्श्वभूमीवर देशातील अर्थिक परिस्थिती बिकट झाली आहे. सध्याच्या घडीला देशाची अर्थव्यवस्था स्वातंत्र्यानंतर आतापर्यंतच्या काळातील सर्वात निच्चांक पातळीवर जाईल, अशी भीती नारायण मूर्ती यांनी व्यक्त केली आहे. अर्थव्यवस्थेला पुन्हा रुळावर आणण्यासाठी लवकरात लवकर सक्षम पावले उचलण्याची गरज आहे, असे नारायण मूर्ती यांनी म्हटले आहे. 

हे वाचा - रशियाची कोरोनावरील लस भारताला मिळणार का?

यंदाच्या वर्षात  'सकल राष्ट्रीय उत्पादन' (ग्रॉस डोमेस्टिक प्रॉडक्ट) अर्थात जीडीपीचा दर 1947 नंतर पहिल्यांदाच सर्वात निच्चांक पातळीवर पोहचण्याची शक्यता आहे. यात सुधारणा करण्यासाठी काही नवी धोरणे आखावी लागतील, असेही त्यांनी म्हटले आहे. मूर्ती यांनी भारतातील डिजिटल क्रांती नेतृत्व या बंगळुरमधील आयोजित बेबिनारमध्ये देशातील अर्थिक परिस्थितीवर चिंता व्यक्त केली. त्यांच्या या भाकितावरुन राहुल गांधी यांनी  मोदी है तो मुमकीन है! अशा शब्दात उपहासात्मक टोला लगावला आहे.