Air India New York-Delhi Flight Case : एअर इंडियाच्या न्यूयॉर्क-दिल्ली विमानात लघवी केल्याचा आरोप असलेल्या शंकर मिश्रा या व्यक्तीची चौकशी करण्यासाठी दिल्ली पोलीस मुंबईत पोहोचलेत. ते आता मिश्राच्या नातेवाईकांना भेटणार आहेत.

26 नोव्हेंबर 2022 रोजी एअर इंडियाच्या विमानात 77 वर्षीय महिलेवर लघवी करणाऱ्या व्यक्तीचं नाव शंकर मिश्रा असं आहे. न्यूयॉर्क ते नवी दिल्ली या एअर इंडियाच्या बिझनेस क्लास फ्लाइटमध्ये आरोपी शंकर मिश्रा (Shankar Mishra) यानं मद्यधुंद अवस्थेत आपल्या सहप्रवाशावर लघवी केली.

याप्रकरणी दिल्ली पोलिसांनी (Delhi Police) शंकर मिश्रा विरोधात एफआयआर नोंदवला असून त्याच्या अटकेसाठी लूकआउट सर्कुलरची मागणी केलीये. या प्रकरणात नाव आल्यानं शंकर मिश्रा फरार आहे. याप्रकरणी दिल्ली पोलीस शंकर मिश्राला लवकरात लवकर अटक करणार आहे. दरम्यान, शंकर मिश्राच्या नातेवाईकांना भेटण्यासाठी दिल्ली पोलीस मुंबईत पोहोचले आहेत.

शंकर मिश्रा हे वेल्स फार्गो (Wells Fargo) या अमेरिकन बहुराष्ट्रीय वित्तीय सेवा कंपनीच्या इंडिया चॅप्टरचे उपाध्यक्ष आहेत. वेल्स फार्गोचे मुख्य कार्यालय कॅलिफोर्निया इथं आहे. इंडिया टुडेच्या वृत्तानुसार, शंकर मिश्रा यांच्या लिंक्डइन प्रोफाइलमध्ये असं म्हटलंय की, ते मुंबईतील एका बहुराष्ट्रीय कंपनीमध्ये काम करतात. मात्र, आदल्या दिवशी अनेक मीडिया रिपोर्ट्समध्ये शेखर मिश्रा असं आरोपीचं नाव असल्याचा दावा करण्यात आला होता. शंकर मिश्रा हे मुंबईतील मीरा रोडचे रहिवासी आहेत.

'या' कलमान्वये शंकर मिश्राविरुद्ध गुन्हा दाखल

शंकर मिश्रा विरुद्ध IPC कलम 294 (सार्वजनिक ठिकाणी अश्लील कृत्य), 354 (महिलेचा विनयभंग करण्याच्या हेतूनं तिच्यावर हल्ला किंवा बळजबरी करणं), 509 (महिलेचा विनयभंग करण्याच्या हेतूनं अश्लील शब्द, हावभाव किंवा कृत्य करणं) आणि 510 ( मद्यधुंद व्यक्‍तीकडून सार्वजनिक ठिकाणी गैरवर्तन), तसंच विमान नियमांनुसार गुन्हा दाखल करण्यात आला आहे.