मुंबईच्या (Mumbai) महापौर किशोरी पेडणेकर (Kishori Pednekar) यांनी कोरोनाच्या पार्श्वभूमिवर माध्यमांशी संवाद साधला. यावेळी पेडणेकर यांनी कोरोनाच्या होम टेस्टबद्दल माहिती दिली. मुंबईत काल पर्यंत 1लाख 35 हजार लोकांनी कोरोना होम टेस्ट केली असून, होम टेस्ट मध्ये 3549 पॉझिटिव्ह आले असल्याची माहिती किशोरी पेडणेकर यांनी दिली आहे.

कोरोना होम टेस्ट कारण्यासाठी आधारकार्ड द्यावा लागेल. पॉझिटिव्ह रुग्ण कळावेत यासाठी आधारकार्ड महत्वाचा असेल अशी माहिती पेडणेकरांनी दिली आहे. पाळीव प्राण्यांसाठी शव वाहिणी तयार करण्यासंदर्भात त्यांनी माहिती दिली. मुंबईत मुक्या प्राण्यांची स्मशानभूमी नाही, त्यामुळे मुक्या पाळीव प्राण्यांसाठी शवदाहिनी उभारण्यात येणार आहे अशी माहिती किशोरी पेडणेकरांनी दिली.

दरम्यान, कोरोना संसर्ग वाढत असल्यामुळे मुंबईकरांना वैद्यकीय सेवा देणारे डॉक्टर आणि वैद्यकीय कर्मचाऱ्यांना बाधा होण्याचे प्रमाण वाढत आहे. पालिका तसेच खासगी रुग्णालयामध्ये डॉक्टरांना संसर्ग ही संख्या वाढत आहे. त्यातच 598 निवासी डॉक्टरांना कोरोनाची बाधा झाल्याने आरोग्य व्यवस्थेवरील ताण वाढत चालला आहे.