एका महिलेने दीड वर्षाच्या मुलाचा गळा दाबून खून केला. पतीने मुलाची डीएनए चाचणी करण्याची मागणी केल्यानंतर आणि मुलाचा वडील होण्यास नकार दिल्यानंतर महिलेने हे पाऊल उचलल्याची माहिती पोलिसांनी दिली. ही घटना काही दिवसांपूर्वी मध्य प्रदेशातील अनुपपूर जिल्हा मुख्यालयापासून ६० किमी अंतरावर असलेल्या बिजुरी भागात घडली होती.

पोलिसांनी दिलेल्या माहितीनुसार, रविवारी मध्यरात्री २६ वर्षीय महिला खोलीतून बाहेर आली आणि म्हणू लागली की तिचा मुलगा प्रतिसाद देत नाही. यावेळी कुटुंबीयांनी खोलीत जाऊन बघितले असता मुलाच्या नाकातून रक्त येत होते. यानंतर कुटुंबीयांनी याची माहिती पोलिसांना दिली. तपास सुरू केल्यानंतर मुलाच्या वडिलाला पत्नीच्या चारित्र्यावर संशय (Doubt over character) असल्याचे समजले, असे कोटमाचे उपविभागीय पोलिस अधिकारी एसएस बघेल यांनी सांगितले.

पत्नी माहेरी गेली असता गरोदर राहिली. यामुळे पतीला पत्नीच्या चारित्र्यावर संशय आला. यामुळे तो मुलाला स्वीकारण्यास नकार देत होता. तसेच त्याला मुलाची डीएनए चाचणी करायची होती. यामुळे कंटाळलेल्या पत्नीनेच मुलाचा गळा दाबून खून (murder) केला. शवविच्छेदन अहवालात महिलेनेच मुलाचा गळा दाबून खून केल्याचे स्पष्ट झाले आहे. महिलेविरुद्ध गुन्हा दाखल करून अटक केल्याची माहिती बघेल यांनी दिली.