नवी दिल्ली : नागरिकत्व सुधारणा कायद्याच्या विरोधात दिल्लीतील शाहिन बागमध्ये आंदोलन झालं होतं. भारतात या कायद्याला जोरदार विरोध झाला होता. मात्र, दिल्लीतील शाहिन बागमधील आंदोलन हे चांगलेच गाजले होते. या आंदोलनाचा चेहरा म्हणून बिल्किस दादी या प्रसिद्धिस आल्या होत्या. गेल्या काही दिवसांपूर्वीच 'टाइम' या प्रसिद्ध नियतकालिकाने जाहिर केलेल्या जगातील सर्वात प्रभावी 100 व्यक्तिमत्वामध्ये बिल्कीस दादी यांचाही समावेश करण्यात आला आहे. 

टाइम हे जगप्रसिद्ध नियतकालिक असून दरवर्षी ते जगातील प्रभावशाली अशा 100 व्यक्तींच्या नावाची यादी जाहिर करते. यंदाही टाइमने ही यादी जाहिर केली आहे. यामध्ये अभिनेता आयुष्यमान खुराणा, गूगलचे सीईओ सुंदर पिचाई, रविंदर गुप्‍ता, बिलकिस दादी आणि नरेंद्र मोदी या काही भारतीयांचा समावेश आहे. 
आपलं नाव प्रभावशाली व्यक्तींच्या यादीत समाविष्ट झाल्याबद्दल आनंद व्यक्त करताना त्यांनी म्हटलं की, नरेंद्र मोदी हे त्यांच्या मुलासारखेच आहेत. त्यांनी मला भेटायला बोलावलं तर मला आनंद होईल. 

हेही वाचा - कोरोनाविरोधातील लढ्यासाठी 'कॉफी विद कलेक्टर' ; नॉयडाच्या जिल्हाधिकाऱ्यांचा अनोखा उपक्रम

गेल्या वर्षी संसदेत सुधारित नागरिकत्व कायदा पारित झाल्यानंतर या कायद्याच्या विरोधात देशभरात आंदोलने झाली होती. शाहिनबागमधील आंदोलनात सामील असणाऱ्या बिल्कीस दादी यांनी म्हटलं होतं की, कितीही कडक थंडी असो वा पाऊस कोसळो, आम्ही आमचे आंदोलन सुरुच ठेवू. जामिया विद्यापीठात आमच्या मुलांना मारलं गेलं तेव्हाही आम्ही मागे हटलो नाही. आमच्या समोर गोळ्या झाडल्या गेल्या पण आम्ही मागे हटलो नाही. 

हेही वाचा - प्रसिद्ध पार्श्वगायक एस. पी. बालसुब्रमण्यम यांचे निधन

बिल्कीस दादी यांना जेव्हा विचारलं गेलं की, जर पंतप्रधानांनी त्यांना भेटीचं आमंत्रण दिलं तर त्या जातील का? यावर त्या म्हणाल्या की, मी जरुर जाईन. यात घाबरण्यासारखं काय आहे? त्यांनी पुढे म्हटलं की, नरेंद्र मोदी हे माझ्या मुलासारखेच तर आहेत. मी त्यांच्या आईसारखीच आहे. टाइमच्या यादीत मोदींचं नाव आल्याबद्दल मी त्यांचंही अभिनंदन करते.