लखनऊ : "देशातील ९५ टक्के लोकांना पेट्रोलची गरजच नाही," असं अजब विधान उत्तर प्रदेश सरकारचे मंत्री उपेंद्र तिवारी यांनी केलं आहे. पेट्रोल-डिझेलच्या दरवाढीवरुन मोदी सरकारला सध्या लोकांचा रोष सहन करावा लागत आहे. यापार्श्वभूमीवर सरकारच्या समर्थनार्थ तिवारी यांनी हे विधान केलं आहे.

तिवारी म्हणाले, जर दरडोई उत्पन्नाची देशातील इंधनाच्या किंमतीशी तुलना केली तर इंधनाचे दर खूप कमी आहेत. "मोजकेच लोक चारचाकी वापरतात आणि त्यांना पेट्रोलची गरज असते. 95 टक्के लोकांना पेट्रोलची गरज नसते. दरम्यान, 100 कोटीपेक्षा जास्त लसीचे डोस लोकांना मोफत दिले गेले"

देशात आज (गुरुवारी) कोरोना लसीकरणाचा १०० कोटी डोसचा टप्पा पूर्ण झाला. यानिमित्त केंद्र सरकारचे विविध मंत्र्यांकडून आणि राजकीय व्यक्तींकडून अभिनंदन करण्यात आले. यानिमित्त केंद्रानं गायक कैलाश खेर यांच्या आवाजातील एका थीम सॉंगचं प्रकाशन केलं. दरम्यान, जागतीक आरोग्य संघटनेनंही या विशेष कामगिरीबद्दल भारतीयांचं अभिनंदन केलं आहे.

देशात जानेवारी २०२१ मध्ये सार्वत्रिक लसीकरण मोहिमेला सुरुवात झाली. त्यानंतर आज १०० कोटी डोस पूर्ण झाल्यानंतर या मोहिमेतील मोठा मैलाचा टप्पाचा पार पडला. यामध्ये पहिला डोस आणि दोन्ही डोस यांचा समावेश आहे.