नवी दिल्ली : आपण विमानातून प्रवास करत असाल तर ही बातमी तुमच्या साठी आहे. आपण प्रवास करत असताना पायलट झोपी गेल्याचं आपल्याला समजलं तर काय होईल? हा विचार करूनच आपल्या अंगावर काटा येईल पण हा गंमतीचा विषय नाहीये कारण जवळपास ६६ टक्के वैमानिक प्रवासादरम्यान विमान चालू असताना झोपत असल्याचं समोर आलं आहे.

(Pilot sleeping During Travel)

आपण प्रवास करत असलेल्या विमानातील जवळपास ६६ टक्के पायलट विमान चालू असताना विमानाच्या कॉकपीठमध्ये झोपत असतात अशी धक्कादायक माहिती एका सर्वेक्षणातून समोर आली आहे. तर काही वैमानिकांनी आपण झोपत नसल्याचं सांगितलं आहे. सेफ्टी मॅटर्स फाउंडेशन नावाच्या संस्थेने हे सर्वेक्षण केलं असून यामधून हा धक्कादायक खुलासा झाला आहे.

विमान चालू असताना जवळपास ५४ टक्के वैमानिकांना अधिक तीव्र झोप येते तर ४१ टक्के वैमानिकांना मध्यम स्वरूपाची झोप येत असल्याचं या सर्वेक्षणातून समोर आलं आहे. सतत आणि अधिकच्या कामामुळे शारिरीक आणि मानसिक थकवा येतो आणि त्यामुळे वैमानिकांना झोप येण्याच्या समस्यांना तोंड द्यावे लागत असल्याचं यातून समोर आलं आहे.

दरम्यान, अशा घटनामुळे अनेक विमान अपघात झाल्याचं समोर आलं आहे. २०१० मध्ये मंगळूर येथे झालेल्या विमान अपघातामध्ये जवळपास १५८ लोकांचा मृत्यू झाला होता. अपघात झालेल्या विमानाचा पायलट हा जवळपास पावणेदोन तास झोपला होता असं नंतर झालेल्या चौकशीतून समोर आलं होतं.