उत्तर प्रदेशच्या विधानसभा निवडणुकांच्या (Uttar Pradesh Assembly Elections 2022) पार्श्वभूमीवर उत्तर प्रदेशमध्ये राजकीय हालचाली सुरु झाल्या आहेत. समाजातील प्रत्येक घटकाचं समर्थन मिळवण्यासाठी सर्वच पक्ष प्रयत्न करत आहेत. अशातच तृतीयपंथी समुदायाच्या (Transgender Community) सदस्यांनी उत्तर प्रदेशचे मुख्यमंत्री योगी आदित्यनाथ (CM Yogi Adityanath) यांना समर्थन दिलं आहे. उत्तर प्रदेशचे मुख्यमंत्री योगी आदित्यनाथ आज आपला उमेदवारी अर्ज दाखल करणार आहेत. त्यांना समर्थन देण्यासाठी गोरखपूरमध्ये आलेल्या तृतीय पंथ्यांनी माध्यमांशी संवाद साधत असताना पंतप्रधान नरेंद्र मोदी हे भगवान राम आणि योगी आदित्यनाथ लक्ष्मण असल्याचं म्हटलं आहे.

तृतीयपंथी समुदायाच्या सदस्यांनी सांगितलं की, योगी आदित्यनाथ हे उत्तर प्रदेशचे असे एकमेव मुख्यमंत्री आहेत ज्यांनी ट्रान्सजेंडर समुदायासाठी महत्वाची पावलं उचलली. टाईम्स नाऊशी बोलताना “योगी जी पुन्हा एकदा राज्याचे मुख्यमंत्री व्हावेत. राज्यातील कायदा आणि सुव्यवस्थेत कमालीची सुधारणा करणारे ते एकमेव आहेत" असं ते म्हणाले.

आगामी उत्तर प्रदेश निवडणुकीत सत्ताधारी भाजपला तृतीयपंथी समाजाचं पूर्ण समर्थन असून, भाजप हा एकमेव पक्ष आहे ज्याने तृतीय पंथींसाठी काम केलं आहे असा दावा केला.