नवी दिल्ली : ''राफेल चांगल्या दर्जाचे विमान आहे. हे विमान जेव्हा उपखंडात येईल. तेव्हा ते महत्त्वपूर्ण ठरणार आहे. राफेल विमान खरेदीचा करार हा सरकारने घेतलेला एक अत्यंत धाडसी निर्णय आहे. राफेल विमान आणि एस-400 एअर डिफेन्स प्रणालीमुळे भारतीय सुरक्षाव्यवस्था भक्कम होईल'', असे हवाईदल प्रमुख बी. एस. धनोवा यांनी आज (बुधवार) स्पष्ट केले.  

राफेल विमानाच्या मुद्यावरून देशभरात भाजप आणि काँग्रेस असा राजकीय वाद सुरु आहे. असे असताना स्वत: हवाईदल प्रमुखांनी फ्रेंच कंपनी दसॉल्ट एव्हिएशनसोबत झालेला करार योग्य आहे. राफेल करारामधून आम्हाला अनेक फायदे मिळाले आहेत, असे सांगितले. 

दरम्यान, फ्रेंच कंपनी दसॉल्ट एव्हिएशनला आपल्या ऑफसेट भागीदाराची निवड करायची होती. त्यामध्ये सरकार आणि भारतीय हवाई दलाची कोणतीही भूमिका नव्हती, अशी माहितीही धनोआ यांनी दिली.