नवी दिल्ली : ट्विटर आणि सरकारमधील वादाने आता राजकीय वळण घेतले आहे. काँग्रेस नेते राहुल गांधींनी या वादावरून केंद्र सरकारला चिमटा काढताना म्हटले की, सरकार ‘ब्लू टिक’साठी भांडत असल्याने लसीकरणासाठी आता लोकांना आत्मनिर्भर होण्याखेरीज पर्याय उरलेला नाही.

केंद्राने सोशल मिडियासाठी जारी केलेल्या डिजिटल नियमावलीकडे ट्विटरने केलेले सपशेल दुर्लक्ष यामुळे माहिती व तंत्रज्ञान मंत्रालयाने नाराजीचे संकेत दिले असताना ट्विटर कंपनीने उपराष्ट्रपती व्यंकय्या नायडूंसह राष्ट्रीय स्वयंसेवक संघाचे सरसंघचालक मोहन भागवत आणि इतर पदाधिकाऱ्यांच्या ट्विटर खात्यांवरील अधिकृतपणा दर्शविणारी निळी खूण (ब्ल्यू टिक) हटविली. काही तासांनंतर ही ‘ब्लू टिक’ ट्विटरने पूर्ववत केली असली तरी केंद्र सरकारने हा प्रकार गांभीर्याने घेतला असून ट्विटरला नियमावली पालनासाठी पुन्हा एकदा आठवण करून दिली. नियम पाळा अन्यथा कारवाईला तयार राहा, असा अंतिम इशाराही दिला आहे.

या साऱ्या प्रकारावरून राहुल गांधींनी केंद्र सरकारचा प्राधान्यक्रम वेगळा आहे, अशी खिल्ली उडवली. मोदी सरकार ‘ब्लू टिक’साठी भांडत आहे. तुम्हाला कोरोना प्रतिबंधक लस हवी असेल तर तुम्हाला आत्मनिर्भर बनावे लागेल, असे खोचक ट्विट राहुल गांधींनी केले. याआधीही केंद्राच्या लसवितरण धोरणावरून राहुल गांधींनी सातत्याने टिका चालविली आहे. निष्पक्ष धोरणाचा अभाव असल्यामुळेच लसीचे योग्य वितरण होत नसल्याचा आरोप राहुल गांधींनी केला आहे.