Rahul Gandhi Net Worth: राहुल गांधी हे देशातील सर्वात जुन्या राजकीय पक्षाचे नेते आहेत. 1970 मध्ये राहुल गांधींचा जन्म झाला आज ते 53 वर्षांचे झाले आहेत.

दरम्यान, तीनवेळा खासदार झालेले आणि नुकतेच सदस्यत्व गमावलेल्या राहुल गांधी यांच्या मालमत्तेत त्यांचे स्वतःचे घरही नाही. फक्त शेतजमीन आणि पोस्ट ऑफिस इत्यादींमध्ये केलेली काही गुंतवणूक आहे.

राहुल गांधी दरवर्षी सुमारे एक कोटी रुपयांच्या उत्पन्नावर आयकर भरतात. 2019 च्या लोकसभा निवडणुकीदरम्यान त्यांनी दिलेल्या प्रतिज्ञापत्रानुसार, त्यांनी गेल्या सलग 5 वर्षांपासून सुमारे 1 कोटी रुपयांच्या उत्पन्नावर आयकर भरला होता.

राहुल गांधींच्या नावावर घर नाही तर दुकान आहे

राहुल गांधींच्या प्रतिज्ञापत्रानुसार, त्यांची मालमत्ता सुमारे 15 कोटी रुपये आहे, तर त्यांच्यावर सुमारे 72 लाख रुपयांचे कर्ज आहे. राहुल गांधी यांचे दिल्लीतील महरौली येथे एक शेत आहे ज्याची किंमत सुमारे एक कोटी रुपये आहे.

गुरुग्राममधील एका व्यावसायिक इमारतीत त्यांची जागा आहे. त्याची किंमत 8.75 कोटी रुपये आहे. एक प्रकारे त्यांच्याकडे घर नसून दुकान (व्यावसायिक जागा) आहे.

पोस्ट ऑफिस शेअर्समध्ये गुंतवणूक:

राहुल गांधींच्या 3 खात्यांमध्ये सुमारे 18 लाख रुपये आहेत. बाँड-डिबेंचर्स आणि शेअर्समध्ये त्यांनी एकूण सुमारे 5 कोटी रुपयांची गुंतवणूक केली आहे.

तर राहुल गांधी यांनी पोस्ट ऑफिस योजनांमध्ये सुमारे 40 लाख रुपयांची गुंतवणूक केली असून त्यांच्याकडे 2.91 लाख रुपयांचे दागिने आहेत. राहुल गांधी यांच्याकडे स्वतःचे कोणतेही वैयक्तिक वाहन नाही.

राहुल गांधी हे केरळच्या वायनाड मतदारसंघाचे खासदार होते. याआधी ते दोन वेळा उत्तर प्रदेशच्या लोकसभा मतदारसंघातून निवडणूक जिंकून खासदार झाले आहेत. 2019 च्या सार्वत्रिक निवडणुकीत स्मृती इराणी यांनी त्यांचा अमेठीमधून पराभव केला होता.