जयपूर : राजस्थानमधील एका व्यक्तीने आत्महत्या करण्यापूर्वी आपल्या मुलाला आणि पत्नीला मारल्याची घटना घडली आहे. सदर घटना ही राजस्थानातील सिकर मधील गौवाणी या गावात घडली आहे. सदर कुटुंब मुंबईत राहत असून ते होळीसाठी राजस्थानातील आपल्या जुन्या घरी आले होते. घरातील मृत महिलेच्या अंगावर जखम आढळल्याचं पोलिसांनी सांगितलं आहे.

सदर घटना ही शनिवारी रात्री साधारण १०.३० च्या दरम्यान घडली आहे. स्थानिकांना शुक्रवारपासून सदर कुटुंबातील व्यक्ती न दिसल्याने हे प्रकरण उघडकीस आलं आहे. "आम्ही घटनास्थळी पोहोचलो तेव्हा घर आतून लावलं होतं. आम्ही दरवाजा तोडून आत प्रवेश केला तेव्हा एक मृतदेह घरातील फॅनला लटकताना आम्हाला दिसला आणि पलंगावर एका लहान मुलाचा आणि महिलेचा मृतदेह आढळला." असं सिकर परिसरातील नीम का ठाना सदर पोलिस स्टेशनमधील वरिष्ठ अधिकाऱ्यांनी रविवारी सांगितलं.

"संपत कुमावत, पुजा कुमावत (वय. २४) आणि चिनु (२) असे मृतांचे नाव असून संपतने पहिल्यांदा त्याच्या पत्नीला आणि मुलाला मारले आणि त्यानंतर त्याने गळफास लावून आत्महत्या केली असं प्राथमिक तपासातून समोर आलं आहे. मृत महिलेच्या अंगावर जखम आढळून आलेली असून आम्ही घराला सील केलं आहे." असं पोलिसांनी सांगितलं.

अधिक माहिती देताना पोलिसांना सांगितलं की, सदर कुटुंब हे मुंबईत वास्तव्यास असून होळीसाठी ते गावी आले होते. मृत संपत हा मुंबईत नवीन घरातील फरशी बसवण्याचं काम करतो. या घटनेनंतर पूर्ण कुटुंब उध्वस्त झालं आहे. घटनास्थळी कोणतेही पुरावे जसे की, चिट्ठी सापडली नसून त्यांचे घरात भांडणही झाले नसल्याची माहिती शेजाऱ्यांनी दिली. तसेच घटनेचा तपास सुरु असल्याचं पोलिसांनी सांगितलं.