नवी दिल्ली: उत्तर प्रदेशातील हाथरस येथे दलित युवतीवर झालेल्या अत्याचाराचा व हत्येच्या अमानुष घटनेचा मी निषेध करत असून, हे अमानवीय कृत्य करणाऱ्या आरोपींना फाशीची शिक्षा दिली जावी, अशी मागणी केंद्रीयमंत्री रामदास आठवले यांनी केली आहे. ट्विटरवरून त्यांनी व्हिडिओ शेअर केला आहे.

आणखी एका युवतीला मारले: राहुल गांधी

हाथरस येथील सामूहिक बलात्काराच्या घटनेतील पीडितेचा मृत्यू झाल्यानंतर उत्तर प्रदेश सरकारवर सर्वचस्तरातून जोरादर टीका केली जात आहे. शिवाय, आठवले यांनी प्रतिक्रिया व्यक्त न केल्यामुळे त्यांच्यावरही टीका केली जात होती. पण, आठवले यांनी ट्विटरवरून व्हिडिओसह आपली प्रतिक्रिया देताना या घटनेतील आरोपींना लवकरात लवकर फाशी देण्याची मागणी केली आहे.

आठवले म्हणाले, 'उत्तर प्रदेशच्या हाथरस जिल्ह्यात चंपा गाव आहे. त्या ठिकाणी १४ दिवस अगोदर एका दलित मुलीवर सामूहिक बलात्कार झाला होता. ती १९ वर्षांची होती. आता त्या मुलीचा मृत्यू झाला आहे. ही घटना मानवतेला कलंक लावणारी घटना आहे. अतिशय वेदनादायी अशी ही घटना आहे. या घटनेचा मी निषेध करतो. पीडित मृत मुलीस व मुलीच्या कुटुंबीयांना न्याय मिळाला पाहिजे. यासाठी  ३ ऑक्टोबर रोजी  मी उत्तर प्रदेशचे मुख्यमंत्री योगी आदित्यनाथ यांना भेटणार आहे. राज्यपालांची देखील भेट घेणार आहे. पीडित मुलीच्या कुटुंबीयांना संरक्षण व आर्थिक मदत देखील मिळायला हवी. या प्रकरणास जलदगती न्यायालयात आणून सहा महिने किंवा एका वर्षांच्या आत या प्रकरणातील जे आरोपी आहेत, त्यांना फाशीची शिक्षा मिळाली पाहिजे. ज्या प्रकारे निर्भया हत्याकांडामधील आरोपींना फाशीची शिक्षा झाली होती. त्याप्रकारे ही देखील मोठी गंभीर घटना आहे. म्हणूनच या घटनेतील आरोपींना कठोर शिक्षा मिळाली पाहिजे, अशा प्रकारची मी रिपब्लिकन पार्टी ऑफ इंडियाच्या वतीने मागणी करतो आहे. तसेच, सामाजिक न्याय मंत्रालयच्यावतीने देखील मी या घटनेचा तीव्र निषेध व्यक्त करतो.'

माता तू न वैरिणी; बाळाला भोकसून मारले

'विविध ठिकाणी दलितांवर अत्याचार होत असून, ते रोखले पाहिजे. यासाठी सरकारच्यावतीने आम्ही नक्कीच प्रयत्न करू. राज्य सरकारांनी देखील दलितांना संरक्षण दिले पाहिजे. दलितांवरील अत्याचाराच्या घटना जागोजागी वाढत आहेत. ते कमी करण्यासाठी राज्य सरकारांनी पावले उचलायला हवीत. हाथरसमध्ये जी घटना घडली त्या घटनेचा मी पुन्हा एकदा धिक्कार करतो,' असेही आठवले म्हणाले.