नवी दिल्ली : देशातील न्यायालयांमध्ये या वर्षात आतापर्यंत विक्रमी संख्येनं न्यायाधीशांची (Judge) नियुक्ती करण्यात आलीय. 14 ऑगस्ट रोजी पंजाब आणि हरियाणा उच्च न्यायालयात 11 न्यायाधीशांची नियुक्ती करण्यात आली होती. त्यामुळं यावर्षी आतापर्यंत विक्रमी 138 न्यायाधीशांची नियुक्ती करण्यात आलीय. 2016 मध्ये उच्च न्यायालयात (High Court) 126 न्यायाधीशांची नियुक्ती करण्यात आली होती.

सोमवारी कायदा आणि न्याय मंत्रालयानं (Ministry of law and Justice India) एक निवेदन जारी केलं की, पंजाब आणि हरियाणा उच्च न्यायालयात (Haryana High Court) 11 न्यायाधीशांच्या नियुक्तीच्या अधिसूचनेसह यावर्षी सरकारनं विविध न्यायालयांमध्ये 138 न्यायाधीशांची नियुक्ती केली, जी 2016 पेक्षा वाढली आहे. तसंच 126 न्यायाधीशांच्या नियुक्तीचा विक्रमही मागं टाकला आहे.

यापूर्वी 2021 मध्ये उच्च न्यायालयात 120 न्यायाधीशांची नियुक्ती करण्यात आली होती, तर सर्वोच्च न्यायालयात 11 न्यायाधीशांची नियुक्ती करण्यात आली होती. न्यायालयातील न्यायाधीशांच्या नियुक्तीची प्रक्रिया वेगवान करण्यात आल्याचं कायदा मंत्रालयाकडून सांगण्यात आलंय. 13 ऑगस्ट रोजी कायदा मंत्रालयानं अलाहाबाद उच्च न्यायालय, आंध्र प्रदेश उच्च न्यायालय, तेलंगणा उच्च न्यायालय, गुवाहाटी उच्च न्यायालय, ओडिशा उच्च न्यायालय, हिमाचल प्रदेश उच्च न्यायालयात 26 न्यायाधीशांची नियुक्ती केली होती. रविवारी पंजाब आणि हरियाणा उच्च न्यायालयात 11 न्यायाधीशांची नियुक्ती करण्यात आली.