रेल्वे भर्ती परीक्षेत घोटाळा झाल्याचा आरोप करत बिहार (Bihar) आणि उत्तर प्रदेशच्या (Uttar Pradesh) काही जिल्ह्यांत विद्यार्थ्यांनी मोठं आंदोलन (RRB NTPC Protest) सुरू केलं आहे. त्यातच काल बिहारच्या गया शहरात आंदोलकांनी रेल्वेचे डबे पेटवून दिल्याने या आंदोलनाला हिंसक वळण लागलं. पोलिसांनी या प्रकरणात मोठी कारवाई करण्यास सुरूवात केली असून, शेकडो लोकांवर गुन्हे दाखल केले आहेत. त्यानंतर आता पुन्हा आंदोलक विद्यार्थ्यांच्या वतीन उद्या बिहार बंदची हाक देण्यात आली आहे.

आंदोलनामुळे राज्यात वातावरण तापलं आहे. परीक्षा देणाऱ्यांनी कायदा सुव्यवस्था हातात घेतल्याचं पोलिसांनी सांगितलं. विद्यार्थ्यांनी आंदोलन सुरू केल्यानंतर त्याला हिंसक वळण लागलं. पोलिसांनी काही ठिकाणी लाठीचार्ज केला. तर काही ठिकाणी हवेत गोळीबार करण्यात आला. दरम्यान, आंदोलन चिघळल्यानंतर परिक्षार्थींनी थेट ट्रेन पेटवून दिली. या प्रकरणात खान सर या प्रसिद्ध युट्यूबरसह अनेक कोचिंग क्लास चालकांवर गुन्हे दाखल करण्यात आलेले आहेत.

आंदोलनाला अनेक ठिकाणी हिंसक वळण लागलं. हजारो रेल्वे परीक्षार्थी सोमवारी बिहारमधील पाटना येथे रेल्वे स्थानकावर जमले होते. खान सरसह काही इतर कोचिंग क्लासचे संचालक आणि 400 हून अधिक अज्ञात व्यक्तींविरुद्ध एफआयआर नोंदवण्यात आला आहे. मंगळवारी संध्याकाळी राजेंद्र नगर रेल्वे टर्मिनल आणि भिकना पहाडी येथे हिंसाचार घडवून आणणे आणि सरकारी मालमत्तेचे नुकसान केल्याचा आरोप त्यांच्यावर ठेवण्यात आला आहे.