S Jaishankars Russia visit gains significance amid India-US trade war tensions : भारत-रशिया यांच्यातील वाढत्या व्यापारी संबंधांमुळे नाराज झालेले अमेरिकेचे राष्ट्राध्यक्ष ट्रम्प यांनी, भारतावर अन्यायकारकरित्या ५० टक्के टॅरिफ लादला आहे. ज्यामुळे भारत आणि अमेरिका या दोन्ही देशांमध्ये काहीशी कटुता निर्माण होत असल्याचे दिसत आहे. भारतानेही अमेरिकेसमोर आपली भूमिका ठामपणे स्पष्ट केली आहे. तर याच दरम्यान दुसरीकडे भारत आणि रशिया यांच्यासंबंधी अधिकच घट्ट होत आहेत.

कारण, काही दिवासांपूर्वीच भारताचे राष्ट्रीय सुरक्षा सल्लागार अजित डोभाल यांनी रशियाला भेट दिली आणि त्यांनी रशियाचे अध्यक्ष पुतिन तसेच मॉस्कोमध्ये अनेक वरिष्ठ नेत्यांशी चर्चा केली. त्यानंतर आता भारताचे परराष्ट्रमंत्री एस जयशंकर हे देखील रशियाला जाणार असल्याची माहिती समोर आली आहे. एस जयशंकर हे तेथे रशियाचे परराष्ट्र मंत्री सर्गेई लावरोव्ह यांना भेटणार आहेत.

रशियन परराष्ट्र मंत्रालयाने सोशल मीडियावर शेअर केलेल्या पोस्टद्वारे याबाबत माहिती देताना सांगितले की, ‘’२१ ऑगस्ट रोजी मॉस्कोमध्ये भारतीय परराष्ट्र मंत्री एस जयशंकर आणि रशियाचे परराष्ट्र मंत्री सर्गेई लावरोव्ह यांची भेट होणार आहे. या बैठकीत आंतरराष्ट्रीय चौकटीअंतर्गत अनेक महत्त्वाच्या मुद्द्यांवर सहकार्यावर चर्चा केली जाईल. यासोबतच दोन्ही देशांमधील द्विपक्षीय संबंधांवरही चर्चा केली जाईल.’’

 रशियाकडून तेल खरेदी केल्याबद्दल आणि युक्रेन युद्धाला प्रोत्साहन दिल्याच्या आरोपावरून अमेरिकेने भारतावर जादा टॅरिफ लादला आहे. तसेच, अमेरिकन सरकार सध्या पाकिस्तानशी जवळीक वाढविण्यात व्यस्त आहे. अशा परिस्थितीत, भारत देखील त्याच्या सर्व पर्यायांवर विचार करताना दिसत आहे.

याशिवाय, रशियाचे अध्यक्ष व्लादिमीर पुतीन  हे देखील या वर्षाच्या अखेरीस भारत दौऱ्यावर येणार आहेत, अशी माहिती समोर आली आहे. अशा परिस्थितीत, आता  दोन्ही परराष्ट्रमंत्र्यांच्या बैठकीत पुतीन यांच्या भारत भेटीच्या तयारीबाबतही चर्चा होवू शकते.