कुड्डालोर : तामिळनाडूतून (Tamil Nadu Accident) अपघाताची एक मोठी बातमी समोर येत आहे. आज (मंगळवार) पहाटे त्रिची-चेन्नई राष्ट्रीय महामार्गावर सहा वाहनं एकमेकांवर आदळली आणि या अपघातात एकाच कुटुंबातील पाच जणांचा मृत्यू झाला.

या दुर्घटनेत कुड्डालोर जिल्ह्यातील वेयपूर जवळ राष्ट्रीय महामार्गावर (National Highway) 2 खासगी बस, 2 लॉरी आणि 2 कार एकमेकांवर आदळल्या. एएनआयनं दिलेल्या माहितीनुसार, दुर्घटनेत 5 जणांचा जागीच मृत्यू झाला. चालकासह एकाच कुटुंबातील 2 महिला आणि 2 मुलांचा मृत्यू झाल्याचं सांगण्यात येत आहे.

पोलिसांनी सांगितलं की, मृत कुटुंबातील सदस्यांची अद्याप ओळख पटलेली नाही. घटनेची माहिती मिळताच, पोलीस आणि अग्निशमन दल घटनास्थळी दाखल झालं. बऱ्याच प्रयत्नांनंतर मृतांचे मृतदेह बाहेर काढून पोस्टमॉर्टमसाठी वेयपूर शासकीय रुग्णालयात पाठवण्यात आले. या अपघातप्रकरणी पोलिसांनी गुन्हा दाखल केला असून, अपघातात सहभागी असलेले लोक कोणत्या शहरातील आहेत, याचा कसून तपास पोलीस करत आहेत. अपघातानंतर राष्ट्रीय महामार्गावरील वाहतूक विस्कळीत झाली आहे.