काँग्रेस नेते (Congress) आणि अनेकदा वादात सापडलेले मौलाना तौकीर रझा (Tauqeer Raza) यांनी पुन्हा एकदा प्रक्षोभक वक्तव्य केलंय. लाऊडस्पीकर (भोंगा) आणि अजान वादात आता काँग्रेस नेत्यानंही उडी घेतलीय. तौकीर रझा यांनी धमकी देत म्हंटलंय, ज्या दिवशी मुस्लिम रस्त्यावर उतरतील, तेंव्हा त्यांना ताब्यात घेणं अवघड होऊन बसेल. पीएम मोदी (Narendra Modi) धृतराष्ट्र निर्माण करत असून हे त्यांना जड जाणार आहे. मोदींची वृत्ती अशीच राहिली, तर देशाला महाभारत होण्यापासून कोणीही वाचवू शकणार नाही, असा स्पष्ट इशारा त्यांनी दिलाय.

आम्ही 10 दिवसांनी बैठक घेऊन पुन्हा एकदा जेलभरो आंदोलन करणार असल्याचंही त्यांनी सांगितलंय. तौकीर रझा आज उत्तर प्रदेशात पत्रकार परिषदेत बोलत होते. रझा पुढं म्हणाले, 'ज्या दिवशी मुस्लिम (Muslim) रस्त्यावर उतरतील, तेव्हा त्यांना कोणीही रोखू शकणार नाही. मी सरकारला, विशेषत: नरेंद्र मोदींना इशारा देतोय की, त्यांनी आपला मार्ग ताबडतोब बदलावा, अन्यथा देशाचं मोठं नुकसान होईल.'

तुम्ही पंतप्रधान आहात. मात्र, देशाचं प्रतिनिधित्व न करता देशात व्देष पसरवत आहात, हे खूप जड जाणार आहे. तौकीर रझा यांनी पंतप्रधान नरेंद्र मोदींवर निशाणा साधत त्यांना धृतराष्ट्र असंही संबोधलंय. मोदींचं असंच वागणं सुरु राहिलं तर, देशाला महाभारत होण्यापासून कोणीही वाचवू शकणार नाही, असा स्पष्ट इशाराही त्यांनी दिलाय.