नवी दिल्ली: कोरोना योद्ध्यांच्या सन्मानार्थ भारतीय हवाई दल रविवारी (ता. 3) दोन फ्लाय पास्ट करणार आहे. या उड्डाणांदरम्यान कोरोना रुग्णांवर उपचार करणाऱ्या रुग्णालयांवर पुष्पवृष्टी केली जाईल, अशी घोषणा सैन्यदलांचे प्रमुख (चीफ ऑफ डिफेन्स स्टाफ) बिपिन रावत यांनी शुक्रवारी (ता. 1) केली.

३ मे नंतर काय ? मुख्यमंत्र्यांनी फेसबुक लाईव्ह मधून सांगितलं 'असं' काही...

हवाई दलाचे हे फ्लाय पास्ट श्रीनगर ते त्रिवेंद्रम आणि दिब्रूगढ ते कच्छ असे होतील. त्यात लढाऊ आणि मालवाहू विमाने सहभागी होतील, अशी माहिती जनरल बिपिन रावत आणि तिन्ही सैन्यदलांचे प्रमुखांनी पत्रकार परिषदेत दिली. कोव्हिड-19 विषाणूबाधित रुग्णांवर उपचार करणाऱ्या रुग्णालयांवर या विमानांतून पुष्पवृष्टी केली जाईल. त्याचप्रमाणे रविवारीच सशस्त्र दलांकडून पोलिस स्मारकाला पुष्पांजली अर्पण केली जाणार आहे. देशातील जवळपास सर्व जिल्ह्यांतील कोव्हिड रुग्णालयांनजीक लष्कराच्या पथकाचे बॅंडवादन होईल. 

Big News - परवानगी दिली ! विविध राज्यांमध्ये अडकलेल्यांसाठी सरकार सोडणार विशेष ट्रेन..

डॉक्टर, परिचारिका, सफाई कर्मचारी, पोलिस, होम गार्ड, डिलिव्हरी बॉय आणि प्रसार माध्यमे या सर्व कोरोना योद्ध्यांबाबत आम्ही कृतज्ञता व्यक्त करतो. कठीण परिस्थितीत जीवन कसे सुरू ठेवायचे याबाबत सरकारचा संदेश हे कोरोना योद्धे नागरिकांपर्यंत पोहोचवत आहेत. सशस्त्र दले देशासोबत भक्कमपणे उभी आहेत. या युद्धातील विजय म्हणजे देशातील प्रत्येक नागरिकाची शिस्त आणि संयमाचे फळ असेल, असे जनरल रावत म्हणाले. 
कोरोना महामारीमुळे भारतात लॉकडाऊन सुरू झाल्यानंतर पहिल्यांदाच सीडीएस जनरल बिपिन रावत यांनी तिन्ही सैन्यदलांच्या प्रमुखांसह माध्यमांशी संवाद साधला. सैन्यदलांनी देशात अनेक ठिकाणी क्वारंटाईन सेंटर्स सुरू केली आहेत. 

अमेरिकेतही मानवंदना
दोन दिवसांपूर्वी अमेरिकी सैन्यदलानेही कोरोना योद्ध्यांच्या सन्मानार्थ फ्लाय पास्ट केले होते. न्यू यॉर्क, न्यू जर्सी आणि फिलाडेल्फिया येथे झालेल्या या उड्डाणांत यूएस आर्मी, एअर फोर्स आणि नेव्हीमधील 12 लढाऊ जेट विमाने सहभागी झाली होती. या 40 मिनिटांच्या कार्यक्रमाची तयारी तब्बल महिनाभर सुरू होती.