मुलीचे अपहरण केल्याप्रकरणी तरुणाला पोलिस ठाण्यात आणून पोलिसांनी क्रौर्याची परिसीमा ओलांडली. ठाण्यात तरुणाचे कपडे उतरवल्यानंतर क्रिकेटच्या स्टंपवर तेल लावून बसवले. तसेच लघवी प्यायला लावली. हा प्रकार राजस्थानमधील अजमेरच्या जवाजा पोलिस ठाण्यात घडला. तरुणाने साहाय्यक पोलिस अधीक्षक सुमित मेहरा यांच्याकडे लेखी तक्रार करून दोषी पोलिसांवर कारवाईची मागणी केली आहे. हर्ष कमल असे पीडित तरुणाचे नाव आहे. (Police brutality in lockup)

प्राप्त माहितीनुसार, नरेंद्र सिंह (रा. गंगा कॉलनी, उदयपूर रोड चुंगी नाका, बेवार) यांनी फिर्यादीत सांगितले की, त्यांचा नातेवाईक हर्ष कमल हा मुलीला पळवून घेऊन गेला होता. याची माहिती त्यांनी पोलिसांना दिली आणि गांधीधाम येथे कामावर निघून गेले. यानंतर जावजा पोलिसांनी (Police) हर्षला गांधीधाम येथून पकडून पोलिस ठाण्यात आणले. तसेच त्याचे कपडे काढले आणि लॉकअपमध्ये बंद करून बेदम मारहाण केली.

यानंतर पोलिस (police) शिपाई रामराज आणि जितेंद्र सिंग यांच्यासह चार पोलिसांनी क्रिकेटचा स्टंप आणला आणि त्याला तेल लावले. या स्टंपवर बसून छळ केला. एवढेच नाही तर बळजबरीने लघवी करायला लावले आणि प्यायला लावले. तसेच धमक्याही दिल्या. यानंतर पोलिसांनी कलम १५१ अन्वये अटक करून उपविभागीय अधिकाऱ्यांसमोर हजर केले, असा आरोप हर्षने केला आहे.

पोलिस अधीक्षकांनी दिले तपासाचे निर्देश

या प्रकरणामध्ये किती सत्यता आहे, हे तपासानंतरच समोर येईल. हर्षने एसपी अजमेर यांच्यासमोर हजर होऊन दोषी पोलिस अधिकारी आणि पोलिसांवर गुन्हा दाखल करून कारवाईची मागणी केली आहे. त्यांनी प्रकरण गांभीर्याने घेत साहाय्यक पोलिस अधीक्षक सुमित मेहरा यांना तपासाचे निर्देश दिले.