आंध्र प्रदेश, बेळगाव : तिरुपती बालाजीचे दर्शन (Tirupati Balaji Darshan) घेऊन परतणाऱ्या भाविकांच्या वाहनाने मालवाहू ट्रकला मागून जोराची धडक दिल्याने झालेल्या भीषण अपघातात (Road Accident) पाच भाविक जागीच ठार झाले. चालकासह पाचजण बडची गावातील (ता. अथणी जि. बेळगाव) राहणारे आहेत.

शुक्रवारी (ता. १५) सकाळी आंध्र प्रदेशातील (Andhra Pradesh) अन्नमया जिल्ह्यातील तिरुपतीजवळील कव्वीपल्ली येथे हा अपघात घडला आहे. अपघातात अकरा जण गंभीर जखमी झाले असून, त्यांच्यावर रुग्णालयात उपचार सुरू आहेत.

हनुमंत अजूर (वय ३२), महानंदा अजूर (३२), शोभा अजूर (३२), अंबिका अजूर (१४, चौघेही रा. बडची, ता. अथणी, जि. बेळगाव), हनुमंत जाधव (४२) अशी ठार झालेल्यांची नावे आहेत. अकरा जखमींपैकी सात जणांची प्रकृती चिंताजनक आहे.

बेळगाव जिल्ह्यातील अथणी येथील १६ भाविक वाहनांतून तिरुपती बालाजी मंदिरात दर्शन घेऊन घरी परतत होते. हनुमंत जाधव हा वाहन चालवत होता. आंध्र प्रदेशातील अन्नमया जिल्ह्यात आल्यानंतर भरधाव वाहनाने मालवाहू ट्रकला मागून धडक दिल्याने हा भीषण अपघात घडला. सुरुवातीला मृतांची ओळख पटली नाही, त्यांच्याकडे सापडलेल्या ओळखपत्रावरून काही वेळानंतर ओळख पटविण्यात यश आले.

अपघातातील जखमींना तिरुपतीतील रुवा रुग्णालयात दाखल केले आहे. सात जखमींची प्रकृती चिंताजनक आहे. पोलिसांनी मृतांच्या नातेवाईकांना अपघाताची माहिती देऊन घटनास्थळी पाचारण केले. नातेवाईक दाखल झाल्यानंतर पंचनामा करून उत्तरीय तपासणी करण्यात आली. त्यानंतर मृतदेह नातेवाईकांच्या ताब्यात देण्यात आले.

वाहनात सोळा भाविक

नागाबाबू मंडळ पोलिस निरीक्षक मेथाम्पल्ली म्हणाले, ‘भाविकांचे वाहन कडप्पाहून चित्तूरकडे जात होते. वाहनात एकूण सोळा भाविक होते. ते सर्व तिरुपतीचे दर्शन घेतल्यानंतर बेळगावकडे येत होते. अपघात नेमका कसा झाला, याची माहिती मिळत नाही. अपघातात पाच भाविकांचा मृत्यू झाला. तर अकरा जण गंभीर जखमी झाले आहेत. त्यापैकी सात जणांची प्रकृती चिंताजनक बनली आहे.