नवी दिल्ली : एचआयव्हीच्या रुग्णांवरील उपचारांसाठी वापरल्या जाणारी दोन औषधे आता एकत्रितपणे कोरोना व्हायरसच्या रुग्णांवरील उपचारांसाठी वापरली जात असून, अशा प्रकारची भारतातील ही पहिलीच घटना आहे. ‘कोव्हीड-१९’ अर्थात कोरोनाची लागण झालेल्या इटालियन दांपत्यावर जयपूरमधील रुग्णालयात उपचार सुरू आहेत. या दांपत्याला ही औषधे दिली जात आहे. 

ताज्या बातम्यांसाठी डाऊनलोड करा ई-सकाळचे ऍप 

भारताच्या औषध महानियंत्रकांची परवानगी घेण्यात आली आहे. कोरोनाची लागण झालेल्या रुग्णांची संख्या भारतात वाढत असल्याचा पार्श्वभूमीवर हा निर्णय घेण्यात आला आहे. एचआयव्हीच्या रुग्णांवरील दुसऱ्या टप्प्यातील उपचारांमध्ये लोपिनावीर आणि रिटोनावीर ही दोन औषधे जगभर अनेक ठिकाणी मोठ्या प्रमाणात वापरली जातात. जयपूरमध्ये इटालियन दांपत्यावरील उपचारांमध्ये या दोन्ही औषधांचा एकत्रितपणे वापर केला जातो आहे. या औषधांच्या मर्यादीत वापराला भारताच्या औषध नियंत्रकांनी परवानगी दिली आहे. कोरोनाच्या रुग्णांची वाढती संख्या पाहता या औषधांच्या वापरासाठी तातडीने परवानगी देण्याची मागणी भारतीय वैद्यकीय संशोधन परिषदेने (आयसीएमआर) केली होती. 

आणखी वाचा - पुण्यात कोरोनाचे एकूण चार रुग्ण, मुलगी ड्रायव्हरलाही लागण

रुग्णांची अनुमती घेऊन उपचार
एसएमएस रुग्णालयाचे वैद्यकीय अधिष्ठाता डॉ. डी. एस. मीना यांनी सांगितले की, इटालियन दांपत्याला श्वसनाक्रियेत तीव्र स्वरुपातील समस्या निर्माण झाल्यानंतर या दोन्ही औषधांचा एकत्रित वापर करण्याचा निर्णय घेण्यात आला आहे. त्यासाठी संबंधित रुग्णांची संमती घेण्यात आली आहे.

आणखी वाचा - जगाचं टेन्शन वाढलं, चीनमधील बळींची संख्या 4 हजार 

कोरोनाग्रस्त रुग्ण आहे डॉक्टर 
कोरोनाग्रस्त इटालियन व्यक्ती स्वतः डॉक्टर असून, त्यांना कृत्रिम श्वसनयंत्रणेवर ठेवण्यात आले आहे. त्यांना कोरोनाची लागण होण्यापूर्वीपासून श्वसनाची समस्या आहे. त्यांची प्रकृती गंभीर बनल्यानंतर वरील दोन्ही औषधे त्यांना देण्याचा निर्णय घेण्यात आला. आता संबंधित रुग्णाची प्रकृती स्थिर असून, त्यांच्या पत्नीची प्रकृती सुधारली आहे. या दोन औषधांच्या चाचण्या चीनमध्येही घेण्यात आल्या असून, कोरोनाच्या रुग्णांसाठी त्याचा वापर केला जात आहे. थायलंडमध्येही कोरोना बाधितांवरील उपचारांसाठी ही औषधे वापरली जात आहेत. भारतात आलेले १६ इटालियन पर्यटक आणि त्यांचा गाईड यांना कोरोनाची लागण झाल्याचे स्पष्ट झाले आहे.