ट्रक आणि डबल डेकर बस यांच्यात झालेल्या भीषण अपघातामध्ये 18 जणांचा मृत्यू झाला आहे. तर 19 जण गंभीर जखणी झाले असून प्रकृती चिंताजनक असल्याचं म्हटले जात आहे. आज, पहाटे दीड वाजण्याच्या सुमारास उत्तर प्रदेशमधील बाराबंकी येथे लखनऊ-अयोध्या राष्ट्रीय महामार्गावर डबल डेकर बसला ट्रकने मागून धडक दिल्यामुळे भीषण अपघात झाला असून यामध्ये दुर्दैवी 18 जणांचा मृत्यू झाला आहे. 19 जण जखमी झाले असून त्यांच्यावर लखनऊ ट्रामा सेंटर येथे उपचार सुरु आहेत. माहितीनुसार या अपघातातील मृत आणि जखमी झालेले लोक हे मजूर होते. डबल डेकर बस हरयाणावरुन बिहारला जात होती, त्यादरम्यान हा दुर्दैवी अपघात झाला.

बाराबंकी येथे कल्याणी नदीच्या पूलावर डबल डेकर बस एक्सल तुटल्यामुळे खराब झाली होती. मुसळधार पावसामुळे बस रस्त्याच्या बाजूला उभी करण्यात आली होती. चालक आणि वाहक बस दुरुस्त करत होते. मुसळधार पाऊस कोसळत असल्यामुळे प्रवासी आतमध्येच होते. याचवेळी लखनऊकडे जाणाऱ्या एका ट्रकने मागून जोरदार धडक दिली. हा अपघात इतका भीषण होता की काही जणांचा मृत्यू जाग्यावरच झाला.

या भीषण अपघातानंतर पोलिसांनी ताक्ताळ घटनास्थळावर धाव घेतली. त्यानंतर मदतकार्यही सुरु करण्यात आलं. बसमध्ये अडकेलेल्या इतर प्रवाशांना काढण्याचं काम सुरु आहे. या अपघातानंतर राष्ट्रीय महामार्गावर वाहनांच्या लांबच लांब रांगा लागल्या आहेत. जवळपास पाच किलोमीटर प्रर्यंत ट्रफिक जॅम झालं होतं.