UP Election : उत्तर प्रदेश निवडणूक (Uttar Pradesh Election) हिंदुत्त्वाच्या मुद्यावर लढवण्याची तयारी भाजपनं (BJP) केलीय. त्याच पार्श्वभूमीवर राज्यात अनेक मोर्चे, जाहीर सभा होताना दिसताहेत. मात्र, असं असताना विरोधकांना उत्तर देण्याऐवजी भाजप कार्यकर्ते एकमेकांना भिडलेले पहायला मिळाले. स्टेजवर बसण्यावरून एवढा गदारोळ झाला की, लोक एकमेकांवर तुटून पडत होते. या कार्यक्रमादरम्यान जोरदार हाणामारी झाल्याची माहिती आहे.

कनौजमध्ये भाजपच्या जनविश्वास यात्रेदरम्यान ही घटना घडलीय. छिब्रामाळ विधानसभा (Chhibramau Assembly Constituency) क्षेत्रातील नेहरू महाविद्यालयात (Nehru College) जनविश्वास यात्रेअंतर्गत जाहीर सभेसाठी स्टेज तयार करण्यात आला होता. व्यासपीठावर बसण्यावरून विद्यमान आमदार आणि भाजप जिल्हा उपाध्यक्ष यांच्या समर्थकांमध्ये मोठा वाद झाला. भाजपच्या विद्यमान आमदार अर्चना पांडे (Archana Pandey) यांच्या समर्थकांनी भाजप जिल्हा उपाध्यक्ष आणि त्यांच्या समर्थकांवर हल्ला केल्याचा आरोप आहे. नगर दौऱ्यानंतर नेहरू महाविद्यालयात जाहीर सभेचं आयोजन करण्यात आलं होतं.

व्यासपीठावर बसण्यावरून आमदार समर्थक आणि जिल्हा उपाध्यक्षांच्या समर्थकांमध्ये मोठा वाद झाला. भाजपचे स्थानिक नेते विपीन द्विवेदी यांनी मंचावर बसण्यासाठी हा वाद केल्याचा आरोप आहेत. हे प्रकरण इतकं तापलं की, शिवीगाळ करण्याबरोबरच हाणामारी सुरू झाली. त्यामुळं काही काळ गोंधळ उडाला होता. या प्रकरणी विपीन द्विवेदी भाजपच्या विद्यमान आमदार अर्चना पांडे यांच्या समर्थकांवर मारहाणीचा आरोप करत आहेत. तर दुसरीकडं समाजवादी पक्षाचे माजी आमदार अरविंद यादव या प्रकरणाला भाजप नेत्यांमधील वर्चस्वाची लढाई असल्याचं सांगत आहेत.