लखनौ : उत्तर प्रदेशची (UP elections) निवडणूक म्हणजे ८० टक्के विरुद्ध २० टक्के अशी लढत असेल, असे वक्तव्य करून मुख्यमंत्री योगी आदित्यनाथ (Yogi Adityanath) यांनी भाजप सत्ता निश्चितच राखेल असा आत्मविश्वास व्यक्त केला.

कितना बदला यूपी या विषयावर दूरदर्शनवर परिसंवाद झाला. त्याची सांगता करताना योगी म्हणाले की, आमचा पक्ष राष्ट्रवाद, सुशासन आणि विकास या मुद्द्यांवर निवडणूक लढवेल. ८० टक्के समर्थक एका बाजूला असतील, तर विरुद्ध बाजूला २० टक्के असतील. ८० टक्के जनता सकारात्मक उर्जेसह आगेकूच करेल, तर नेहमीच प्रतिकूल राहणारे २० टक्के आणखी विरोध करतील. भाजप मात्र सबका साथ-सबका विकास ही मोहीम पुढे नेण्यासाठी आणखी कार्य करेल आणि जिंकेल. गैरसमजाला बळी पडलेले काही जण लोकसंख्येच्या संदर्भात आपले अस्तित्व लादण्याच्या प्रयत्नात असल्याचे मी ठामपणे सांगू शकतो, असेही विधान त्यांनी केले.

२०१७ पूर्वी राज्यात दंगली व्हायच्या. अट्टल दंगलखोरांना मुख्यमंत्र्यांच्या निवासस्थानी सन्मानित केले जायचे. सरकार आणि पोलिस दंगलखोरांसमोर याचना करायचे. २०१७ नंतर बदल झाला. आज अट्टल दंगलखोर लपून बसले आहेत किंवा परलोकाच्या प्रवासाला गेले आहेत. २०१७ पूर्वी दहशतवादी हवे तेथे स्फोट घडवायचे, पण त्यानंतर एकही स्फोट किंवा दंगल झालेली नाही. हा फरक अगदी सुस्पष्ट आहे, असंही ते म्हणाले.

२० टक्के मुस्लिमांच्या संदर्भामुळे वाद

योगी आदित्यनाथ यांनी टक्केवारीबाबत अधिक भाष्य न केल्यामुळे तर्ककुतर्क लढविले जात आहेत. राज्यातील मुस्लिमांची टक्केवारी २० इतकी आहे. त्यावरून विरोधी पक्षांनी टीकेची झोड उठविली. त्यामुळे वाद निर्माण झाला. ८० विरुद्ध २० टक्क्यांच्या विधानामागे निवडणुकीला जातीय रंग देण्याचा डाव आहे, पण जनता त्याकडे दुर्लक्ष करेल. खरे तर भाजपच्या वाट्याला येणाऱ्या मतांचा उल्लेख योगींनी केला आहे, जो २० टक्के इतका आहे. हिंदू विरुद्ध मुस्लीम असा मुद्दा निर्माण होणार नाही. लोकशाही वाचविण्यासाठी लोक मतदान करतील, असं मत समाजवादी पार्टीचे प्रवक्ते राजेंद्र चौधरी यांनी मांडलंय.