पटना : बिहारमध्ये पार पडलेल्या विधानसभा निवडणुकीत जनता दलाच्या अनेक नेत्यांना पराभवाचा सामना करावा लागला. त्याचाच पाढा आज त्यांनी नितीशकुमारांपुढे वाचून दाखवला. भाजपने सहकार्य न केल्याने आणि कटामुळेच हे घडले आहे, असं त्यांनी एका सुरात सांगून टाकले. पटना येथे जेडीयूची राज्य परिषद आणि पार्टी पदाधिकाऱ्यांची एक बैठक आयोजित करण्यात आली होती. त्यावेळी जेडीयू नेत्यांनी आपल्या पराभवाचे खापर भाजपवर फोडले.
या बैठकीत एका पाठोपाठ एक माजी आमदारांनी आपल्या मनातील सल बोलून दाखवली. चिराग पासवान हे तर फक्त मोहरा होते, पण पडद्यामागे चालणारा सगळा खेळ भाजपचा होता. मतदार आणि कार्यकर्त्यांचे कोणतेच सहकार्य या निवडणुकीत मिळाले नाही, असेही त्यांनी म्हटले आहे. एनआरसी बाबत जेडीयूची भूमिका आणि भाजपच्या माजी मंत्र्याने केलेल्या वक्तव्यामुळे सीमांचल भागातील जनतेमध्ये संभ्रम निर्माण झाला आणि त्याचा फटका जेडीयूला बसला, असेही त्यांनी म्हटले आहे.
विधानसभेसाठी किती जागा लढवायच्या हेच वेळेत न ठरल्याने जेडीयूवर ही वेळ आल्याचे नितीशकुमारांनीही मान्य केले. प्रत्यक्ष मैदानात चित्र वेगळेच होते आणि आपल्याला दिसणारे वेगळेच होते, हे प्रचार करून आल्यानंतर जाणवल्याचे त्यांनी यावेळी सांगितले. आपल्या सरकारची चुकीची प्रतीमा सोशल मीडियावर उभी करण्यात आल्याबाबत त्यांनी सोशल मीडियाला दोष दिला. भाजप आणि इतर सहकाऱ्यांच्या दबावात येऊन मी शपथ घेतली, माझी मुख्यमंत्री बनण्याची इच्छा नव्हती, असा पुनरुच्चारही त्यांनी यावेळी केला.
दुसरीकडे जेडीयूचे राष्ट्रीय अध्यक्ष आरसीपी सिंह यांनी काहीजणांनी मतदारांची दिशाभूल करण्याचे काम केल्याचा आरोप केला आहे. कोरोना काळात जेवढं काम बिहार सरकारने केलं तेवढं अन्य कोणत्या राज्यात झालं नाही, असंही सिंह यांनी म्हटलं आहे.
- देशभरातील आणखी बातम्या वाचण्यासाठी येथे ► क्लिक करा
(Edited by: Ashish N. Kadam)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.