नवी दिल्ली : अमेरिकेचे अध्यक्ष डोनाल्ड ट्रम्प यांचा दौरा सुरू असताना राष्ट्रीय राजधानी दिल्लीच्या मौजपूर भागात नागरिकत्व कायद्याविरोधात झालेल्या हिंसक निदर्शनांची केंद्र सरकारने गंभीर दखल घेतली आहे. ट्रम्प यांच्या दौऱ्यामुळे जाणीवपूर्वक हा हिंसाचार घडविल्याची शक्‍यात गृह खात्याने पडताळून पाहणे सुरू केले असून, हिंसाचारग्रस्त भागामध्ये कडेकोट बंदोबस्त तैनात करण्यात आला आहे.
दिल्लीच्या मौजपूर भागात नागरिकत्व कायद्याविरोधातील निदर्शनांना हिंसाचाराचे गालबोट लागले असून, दिल्ली पोलिसांच्या एका हेडकॉन्स्टेबलला हिंसाचारामुळे प्राण गमवावे लागले; तर शाहदरा भागातील डीसीपीदेखील गंभीर जखमी झाले. हिंसाचार आटोक्‍यात न आल्याने या भागात निमलष्करी दलांना पाचारण करण्यात आले.
गृह खात्याच्या सूत्रांच्या माहितीनुसार, ईशान्य दिल्लीत घडलेला हा हिंसाचार डोनाल्ड ट्रम्प यांच्या दौऱ्याच्या पार्श्‍वभूमीवर जाणीवपूर्वक घडविण्यात आल्याचे दिसते. दिल्ली पोलिसांची यंत्रणा तसेच गृह खात्यानेही या घटनाक्रमावर बारकाईने लक्ष ठेवले असून, पोलिस आयुक्त नियंत्रण कक्षातून मौजपूर भागातील स्थितीवर लक्ष ठेवून असल्याचे गृह सचिव अजय भल्ला यांनी सांगितले.
मौजपूरमधील घटनेनंतर हिंसा भडकण्याची शक्यता असलेल्या जाफराबाद, सिलमपूर, मौजपूर, गौतमपुरी, भजनपुरा, चांदबाग, मुस्तफाबाद, वझिराबाद, शिवविहार या भागामध्ये कडेकोट पोलिस बंदोबस्त तैनात करण्यात आला आहे.
दरम्यान, गृह राज्यमंत्री जी. किशन रेड्डी यांनी हैदराबाद येथे पत्रकारांशी बोलताना दिल्लीतील हिंसाचारावर कडवट शब्दांत प्रतिक्रिया व्यक्त केली. ट्रम्प यांच्या भारत दौऱ्यादरम्यान जाणीवपूर्वक हिंसाचार भडकावून जगभरात भारताची प्रतिमा मलिन करण्याचे हे षड्‍यंत्र असल्याचा आरोप केला; तसेच हेड कॉन्स्टेबलच्या मृत्यूची जबाबदारी राहुल गांधी, औवेसी घेतील काय, असा सवालही केला.
दोन महिन्यांपासून दिल्लीच्या शाहीनबागेत आंदोलन सुरू असून, सरकारने संयमाने परिस्थिती हाताळली आहे. पोलिस बळाचा वापर केलेला नाही; पण शांततेत आंदोलन करण्याऐवजी आज हिंसाचाराचा मार्ग अवलंबण्यात आला आहे. याप्रकरणी गंभीर कारवाई केली जाईल, असा इशाराही त्यांनी दिला.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.