बेळगाव : टपाल खात्याने विद्यार्थ्यांमध्ये स्टॅम्प संग्रहित करण्याची आवड निर्माण करण्याच्या उद्देशाने सहावी ते नववीच्या विद्यार्थ्यांसाठी 'दीनदयाल स्पर्श योजना' नावाची शिष्यवृत्ती सुरु केली आहे. शालेय स्तरावर स्टॅम्प क्लब असलेल्या विद्यार्थ्यांना या शिष्यवृत्तीचा (Scholarship) लाभ घेता येणार आहे.

टपाल खात्याकडून मिळणारे फिलाटेलिक स्टॅम्प संग्रहित करण्याचा छंद अनेक विद्यार्थ्यांमध्ये आहे. एक छंद म्हणून तो पुढे कायम ठेवण्यासाठी आता टपाल खात्यानेही विद्यार्थ्यांना शिष्यवृत्ती (Deendayal Sparsh Yojana Scholarship) देण्याचा निर्णय घेतला आहे.

सहावी ते नववीच्या विद्यार्थ्यांसाठी कर्नाटक मंडल स्तरावर फिलाटेलिक प्रश्नमंजुषा आणि मुद्रांक संकलन स्पर्धा आयोजित केली जाणार आहे. या आधारे २०२३-२४ या वर्षासाठी शिष्यवृत्ती दिली जाईल. वार्षिक ६ हजार रुपये शिष्यवृत्ती मिळणार असून दरमहा विद्यार्थी आणि त्यांच्या पालकांच्या संयुक्त बँक खात्यावर ५०० रुपयाप्रमाणे शिष्यवृत्ती जमा केली जाणार आहे.

या शिष्यवृत्ती योजनेचा लाभ घेण्यासाठी काही अटी आहेत. स्पर्धेत भाग घेणारा विद्यार्थी हा मान्यताप्राप्त शाळेचा विद्यार्थी असावा. तसेच त्या शाळेतील फिलाटेलिक क्लबचा सदर विद्यार्थी सदस्य असावा. शिष्यवृत्तीला पात्र ठरण्यासाठी २०२३ च्या वार्षिक परीक्षेत किमान ६० टक्के गुण मिळविलेले असावे.

बेळगावमध्येही काही शाळांमध्ये असे क्लब असून बेळगावतील विद्यार्थी त्यासाठी पात्र ठरणार आहेत. अधिक माहिती टपाल खात्याच्या www. karnatakapost.gov.in या संकेतस्थळावर उपलब्ध आहे.

५० प्रश्नांची स्पर्धा

स्टॅम्प संकलनाची प्रश्नमंजुषा स्पर्धा ५० प्रश्नांची असेल. बहुपर्यायी उत्तर असलेले प्रश्न विचारले जाणार असून यात चालू घडामोडी, इतिहास, विज्ञान, क्रीडा, संस्कृती, भूगोल विषयासह पोस्टल स्टॅम्प, संगणकसंबंधी विषय असणार आहेत.