मुंबई : शानन ढाकाने एनडीएच्या पहिल्या महिला तुकडीमध्ये सर्वोच्च स्थान पटकावले आहे. संपूर्ण तुकडीमध्ये तिचे स्थान दहावे असून महिलांमध्ये ती प्रथम आली आहे. एनडीएच्या परीक्षेत महिलांनी सहभागी होण्याची ही पहिलीच वेळ आहे.

शाननने एनडीएच्या महिला बॅचमध्ये आपले स्थान पक्के केले आहे. गेल्या वर्षी, सर्वोच्च न्यायालयाने एनडीए परीक्षेत महिलांच्या सहभागी करून घेण्याचे आदेश दिले होते. त्यानंतर १४ नोव्हेंबर २०२१ रोजी लेखी परीक्षा घेण्यात आली होती.

नागरी सेवा किंवा संरक्षण सेवेत रुजू होण्याचे स्वप्न

१९ वर्षीय शानन मूळची हरियाणाची आहे. तिने आर्मी स्कूलमधून शालेय शिक्षण घेतले असून सध्या दिल्ली विद्यापीठाच्या लेडी श्री राम कॉलेज फॉर वुमनमधून बीए करत आहे. ती म्हणते की ती तिला एकतर नागरी सेवा परीक्षा द्यायची होती किंवा संरक्षण दलाची परीक्षा द्यायची होती. एनडीएची अधिसूचना आल्यावर तिने लगेच अर्ज केला.

शालेय जीवनापासूनच गुणवंत

शानन शालेय जीवनापासूनच एक गुणवंत विद्यार्थिनी आहे. तिला दहावीच्या परीक्षेत ९७.४ टक्के आणि बारावीच्या परीक्षेत ९८.२ टक्के गुण मिळाले होते. तयारीबाबत शानन म्हणते की, तिच्या मूलभूत संकल्पना स्पष्ट असल्याने जास्त मेहनत घ्यावी लागली नाही. यासोबतच तिने व्यक्तिमत्त्व चाचणीचीही तयारी सुरू केली आहे.

वडील आणि आजोबांकडून सैन्यात भरती होण्याची प्रेरणा

सैन्यात भरती होणे ही देशाची सेवा आहे, असे शाननचे मत आहे. शाननला तिचे आजोबा सुभेदार चंद्रभान ढाका आणि वडील नायक सुभेदार विजयकुमार ढाका यांच्याकडून सैन्यात भरती होण्यासाठी प्रोत्साहन मिळाले.