सोलापूर: सोलापूर ग्रामीण पोलिस दलाच्या आस्थापनेवरील चालक पोलिस शिपाई पदाच्या रिक्‍त 41 जागांसाठी 1 ऑक्‍टोबरला परीक्षा होणार आहे. त्यासाठी शहरातील पाच परीक्षा केंद्रांची निवड करण्यात आली असून सकाळी दहा वाजता ही परीक्षा सुरु होणार आहे.

चालक पोलिस शिपाई पदाच्या 41 जागांसाठी जिल्ह्यातील चार हजार 612 उमेदवारांनी अर्ज केले आहेत. त्यांची ऑफलाइन परीक्षा पार पडणार आहे. परीक्षेला येताना उमेदवारांनी प्रवेश पत्राबरोबरच सेल्फ डिक्‍लेरेशन फॉर्म व कोरी चार पाने घेऊन यावीत, असे आवाहन ग्रामीण पोलिसांनी केले आहे. दुसरीकडे काळा अथवा निळा बॉलपेन, दोन पासपोर्ट साईज फोटो, ओळखपत्र (आधारकार्ड, पॅनकार्ड, मतदान ओळखपत्र, वाहन चालविण्याचा परवाना, पासपोर्ट) सोबत आणावा, असेही सांगण्यात आले आहे. तर मोबाइल, स्मार्ट वॉच, घड्याळ, ईलेक्‍ट्रिक उपकरणे, कॅलक्‍युलेटर व ब्लू टुथ सोबत नसावे, अशाही सूचना उमेदवारांना देण्यात आल्या आहेत.

सर्वात महत्त्वाची बाब म्हणजे सकाळी दहा वाजता परीक्षा सुरु होणार असल्याने उमेदवारांना सकाळी आठ ते साडेनऊ यावेळेतच परीक्षा केंद्रात उपस्थित राहावे लागणार आहे. त्यानंतर येणाऱ्यांना परीक्षा केंद्रावर प्रवेश दिला जाणार नाही, असेही ग्रामीण पोलिस अधीक्षक कार्यालयाने स्पष्ट केले आहे.

ठळक बाबी...

- चालक पोलिस शिपाई पदासाठी 1 ऑक्‍टोबरला परीक्षा

- शहरातील पाच केंद्रांवर होणार परीक्षा

- जिल्ह्यातील 41 पदांसाठी चार हजार 612 उमेदवारांनी केले अर्ज

- htttp://mahapolicerc.mahaitexam.in/phasone यावरुन काढता येईल प्रवेश पत्र

- उमेदवारांनी परीक्षेसाठी आठ ते साडेनऊ यावेळेत परीक्षा केंद्रांवर उपस्थित राहण्याचे बंधन

सोलापूर जिल्ह्यात पाच परीक्षा केंद्रे

सोलापूर शहर-ग्रामीणमधील पाच केंद्रांवर चालक पोलिस शिपाई पदासाठी परीक्षा होणार आहे. त्यामध्ये कस्तुरबाई कॉलेज ऑफ एज्युकेशन सोलापूर, एचएन कॉलेज ऑफ कॉमर्स, वालचंद कॉलेज ऑफ आर्टस ऍन्उ सायन्स, एन. बी. नवले सिंहगड कॉलेज ऑफ इंजिनिअरिंग, केगाव आणि सिंहगड पब्लिक स्कूल, केगाव या केंद्रांचा समावेश आहे.