भोपाळः मध्य प्रदेशात भाजपने घवघवीत यश मिळवल्यानंतर विद्यमान विधानसभेचे मावळते मुख्यमंत्री शिवराज सिंह चौहाण यांनी एक मुलाखत दिली. ते म्हणाले की, मी निकालांच्या बाबतीत निश्चिंत होतो. मध्य प्रदेशात मोदींची जादू चालली आहे. भाजपला जनतेचा आशीर्वाद मिळाला असून आम्ही स्वतःला नशीबवान समजतो की, मोदींच्या काळात आमचा जन्म झाला.

शिवराजसिंह पुढे म्हणाले की, पंतप्रधान नरेंद्र मोदींच्या नेतृत्वामध्ये गौरवशाली भारताचं निर्माण होत आहे. पंतप्रधानांचं नाव आणि त्यांच्या सभांचा प्रभाव राज्यामध्ये बघायला मिळला. शिवाय राज्यात लोककल्याणकारी योजना राबवल्याने लोकांमध्ये समाधान दिसून आलं.

मुख्यमंत्री पदाबद्दल बोलताना शिवराजसिंह म्हणाले, आम्ही भाजपचे कार्यकर्ते आहोत. देशाच्या उज्ज्वल भविष्यासाठी काम करतोय, पंतप्रधान नरेंद्र मोदी यांच्या नेतृत्वामध्ये देशाने मोठ्या प्रमाणावर प्रगती केली आहे. आम्ही असा विचार करत नाहीत की, आम्हाला काय पाहिजे.. आम्ही कुठं काम केलं पाहिजे, हे पक्ष ठरवत असतो.

मध्य प्रदेशचा मुख्यमंत्री कोण होणार?

‘लाडली बहना’ योजनेमुळे विद्यमान मुख्यमंत्री शिवराजसिंह चौहाण भाव खाऊन जात असले तरी त्यांच्याविषयी जशी राज्यात नाराजी आहे, तशीच भाजपांतर्गतही आहे. त्यामुळे मुख्यमंत्रिपदाचा दावेदार कोण, याची चर्चा सुरू झाली आहे. यावेळी भाजपने केंद्रीय मंत्रिमंडळातील मंत्र्यांसह ७ खासदार आणि प्रदेश उपाध्यक्ष कैलास विजयवर्गीय यांना निवडणुकीच्या रिंगणात उतरविले. त्यापैकी निवास मतदारसंघातील उमेदवार व मंत्री फग्गनसिंह कुलस्ते हे काँग्रेसकडून पराभूत झाले. त्यामुळे नरेंद्र सिंह तोमर, कैलास विजयवर्गीय, विश्वास सारंग ही नावे चर्चेत असली तरी ऐनवेळी ज्योतिरादित्य शिंदे यांचेही नाव समोर येण्याची शक्यता नाकारता येत नाही.

‘लाडली बहना’ योजना आहे तरी काय?

मध्य प्रदेश विधानसभा निवडणुकीमध्ये सुमारे २ कोटी ९० लाख पुरुष मतदार आहेत, तर २ कोटी ८० लाख महिला मतदार आहेत. हीच बाब हेरून भाजपने ऐन विधानसभा निवडणुकीपूर्वी लाडली बहना ही योजना अमलात आणून महिलांच्या बँक खात्यावर १५०० रुपये जमा केले. त्याचवेळी भाजपने प्रचारादरम्यान सत्तेत काँग्रेस सरकार आल्यास ही योजना बंद करणार, असाही प्रचार केला होता. परिणामी, महिला मतदार यावेळी भाजपसाठी महत्त्वाचा ‘फॅक्टर’ राहिल्याचे मानले जाते.