Angarki Chaturthi : मराठी हिंदू कॅलेंडरनुसार, दर महिन्याच्या कृष्ण पक्षातल्या चौथ्या दिवशी संकष्टी चतुर्थी असते, जर ही चतुर्थी मंगळवारी आली तर तिला अंगारकी चतुर्थी म्हणतात. ही चतुर्थी खूप चांगली असते, ज्यांना चतुर्थीचे उपवास सुरू करायचे असतात त्यांना त्याची सुरुवात अंगारकीनेच करावी लागते.

या दिवशी गजाननाची मनापासून आराधना केली तर मनातल्या सगळ्या इच्छा पूर्ण होतात. अशात फराळाला नक्की काय करावं हा प्रश्न असेल ना? तुम्ही कधी उपवसाची इडली खाल्ली आहे का? ट्राय करा ही हटके रेसिपी

साहित्य:

- 1 वाटी वरीचे तांदूळ

- 1 वाटी साबुदाणा पीठ

- एक इनोचे पाकिट

- चवीनुसार मीठ

- हिरव्या मिरच्या साधारण दोन बारीक कापलेल्या

- पाव चमचा अर्धवट कुटलेले जिरे

कृती:

- एका मोठ्या बाऊलमध्ये भगर अर्थात वरीचे तांदूळ आणि साबुदाणा पीठ पाणी घालून व्यवस्थित दोन तास भिजवून ठेवा.

- भगरीतले पाणी काढून मिक्सरमधून त्याची पेस्ट करून घ्या आणि साबुदाण्याचीही पेस्ट करून घ्या.

- या दोन्ही पेस्ट एकत्र करून त्यात मीठ, जिरे आणि हिरव्या मिरच्या घाला; त्यामध्ये थोडेसे इनो मिक्स करा. जेणेकरून इडल्या फुगायला मदत मिळेल

- इडली पात्रात पाणी घालून नंतर त्यामध्ये पाणी उकळू द्या. इडलीच्या भांड्याला तेलाचा हात लावा आणि हे सारण त्यामध्ये भरा

- त्यानंतर साधारण 10-15 मिनिट वाफ घेऊन इडली शिजवून घ्या. नंतर झाकण उघडून इडल्या काढून घ्या

सांबार

साहित्य:

- पाव वाटी शेंगदाणे

- 1 हिरवी मिरची

- 1 चमचा आलं

- 1 चमचा हिरवी मिरची पेस्ट

- 1 चमचा चिंचेचा कोळ

- पाव चमचे जिरे

- पाव वाटी उकडलेले बटाट्याचे तुकडे

- पाव चमचा तिखट

- मीठ आणि गूळ चवीनुसार

- तेल

- जिरे

कृती:

- शेंगदाणे एक तास भिजवा आणि मग त्यातील पाणी काढून जिरे घालून मिक्सरवर वाटा

- एका कढईत तेल तापवा. त्यात मिरची फोडून घाला. आलं आणि मिरची पेस्ट घालून परतवा आणि त्यावर तिखट घाला

- दाण्याची पेस्ट टाकून त्यात आवश्यकतेनुसार पाणी घाला

- बटाट्याच्या फोडी घालून मिक्स करा. वरून चिंचेचा कोळ, गूळ आणि मीठ घालून मिक्स करा आणि उकळी घ्या.