France News: मानवी तस्करीच्या संशयावरून फ्रान्स सरकारने ताब्यात घेतलेल्या विमानातील ३०३ भारतीयांना प्रवास करण्याची परवानगी देण्यात आली आहे. यामुळे मागील तीन दिवसांपासून अडकून पडलेल्या प्रवाशांनी सुटकेचा नि:श्‍वास सोडला आहे.

संयुक्त अरब अमिरातीहून उड्डाण केलेले हे विमान निकाराग्वा देशाच्या दिशेने निघाले होते. या विमानात ३०३ प्रवासी होते आणि त्यांची तस्करी होत असल्याच्या संशयावरून फ्रान्स सरकारने गुरुवारी (ता. २१) ते विमान खाली उतरण्यास लावून ताब्यात घेतले. तेव्हापासून हे सर्व प्रवासी विमानतळावरच अडकून पडले होते. या प्रकरणात भारतीय दूतावासानेही लक्ष घातले होते. विमानतळावरच तात्पुरते न्यायालय स्थापन करून या सर्व प्रवाशांची सुनावणी घेतली जाणार होती.

मात्र, विमानतळ प्रशासनानेच विमानाला उड्डाण करण्याची परवानगी दिल्याने न्यायाधीशांनीही प्रक्रियेतील त्रुटीचे कारण देत सुनावणी रद्द केली. आता हे विमान उद्या (ता. २५) सकाळी पॅरिसहून उड्डाण करणार आहे. मात्र, प्रवासी भारतीय असल्याने ते भारतात येणार, की जाण्याचे मूळ ठिकाण निकाराग्वा असल्याने तिकडे जाणार, की ज्या शहरातून उड्डाण केले होते त्या दुबईला जाणार, हे अद्याप स्पष्ट झालेले नाही.

विमानातील काही प्रवाशांनी आपल्या कुटुंबीयांशी दूरध्वनीवरून संवाद साधला आहे. प्रवाशांपैकी १० जणांनी फ्रान्स सरकारकडे आश्रय देण्याची मागणी केली आहे. विमानात पालक बरोबर नसलेली ११ बालके होती. हे विमान रोमानियामधील एका कंपनीचे आहे. त्यांनी मानवी तस्करीचा आरोप फेटाळून लावला आहे.